![Mayem](http://media.assettype.com/dainikgomantak%2F2024-06%2F7f2bbd1d-9cae-4467-a3c5-97b53c0e96da%2FManoj__15_.jpg?w=480&auto=format%2Ccompress&fit=max)
डिचोली, तालुक्यातील मये-वायंगिणी पंचायतीच्या सरपंचपदाची माळ अखेर अपेक्षेप्रमाणे सीमा आरोंदेकर यांच्या गळ्यात पडली आहे. रिक्त सरपंचपदासाठी घेण्यात आलेल्या पंचायत मंडळाच्या बैठकीत आरोंदेकर यांची बिनविरोध निवड झाली. गत पंचायत मंडळाच्या कार्यकाळात सीमा आरोंदेकर यांनी सरपंचपद भूषविले होते.
अंतर्गत करारानुसार विद्यानंद कारबोटकर यांनी सरपंचपदाचा राजीनामा दिल्यानंतर मये-वायंगिणी पंचायतीचे सरपंचपद रिक्त झाले होते. नवीन सरपंच निवडण्यासाठी शनिवारी बोलाविण्यात आलेल्या बैठकीस मावळते सरपंच विद्यानंद कारबोटकर उपसरपंच सुफला चोपडेकर यांच्यासह दिलीप शेट, वासुदेव गावकर, कृष्णा चोडणकर,
विशांत पेडणेकर, कनिवी कवठणकर, सुवर्णा चोडणकर, वर्षा गडेकर आणि विनिता पोळे हे पंचसदस्य उपस्थित होते. सरपंचपदासाठी सीमा आरोंदेकर यांनी सादर केलेला एकमेव अर्ज निर्वाचन अधिकाऱ्यांनी ग्राह्य धरुन त्यांची बिनविरोध निवड झाल्याचे जाहीर केले.
निवडणूक प्रक्रिया सुरळीत होण्यासाठी पंचायत सचिव महादेव नाईक यांनी सहकार्य केले. आमदार प्रेमेंद्र शेट तसेच सर्व पंचसदस्यांच्या सहकार्याने पंचायतीचा विकास पुढे नेण्यासाठी मी कार्यरत राहणार, असे नवनिर्वाचित सरपंच आरोंदेकर यांनी सांगितले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.