Bomb Threat on Goa: गोवा-अहमदाबाद विमानात बॉम्ब ठेवल्‍याची धमकी! ‘दाबोळी’, ‘मोपा’वर कडक सुरक्षा; एकाच दिवशी 85 विमानांसाठी ट्विट

Goa Airports on High Alert Following Bomb Threat on Flight

पणजी: गोव्यातून अहमदाबाद येथे आज दुपारी गेलेल्या विमानात बॉम्ब ठेवण्‍यात आल्‍याची धमकी देण्‍यात आल्‍यानंतर अहमदाबादच्या सरदार वल्लभभाई पटेल विमानतळावर या विमानाची आणि प्रवाशांची कसून तपासणी करण्यात आली.

या प्रकारामुळे दाबोळी येथील आंतरराष्ट्रीय विमानतळ आणि मोपा येथील मनोहर आंतरराष्ट्रीय विमानतळ या दोन्ही विमानतळांवरील सुरक्षा व्यवस्थेत वाढ करण्यात आल्याची माहिती सूत्रांनी दिली आहे. या दोन्ही विमानतळांवर बॉम्ब पडताळणी समित्या स्थापन करण्यात आल्या आहेत. तसेच धमक्‍यांबाबत चौकशी केली जात आहे.

देशात एकाच दिवशी ८५ विमानांसाठी ट्विट

राष्ट्रीय पातळीवरही अनेक विमानांना बॉम्बने उडवून देण्‍याची धमकी मिळाली आहे. आज दिवसभरात ८५ मार्गांवरील विमाने बॉम्‍बने उडून देण्याच्या धमक्या मिळाल्या असल्याचे वृत्त विविध वृत्तवाहिन्‍यांनी दिले आहे. तर, गेल्‍या अकरा दिवसांत अडीचशे मार्गांवरील विमानांना अशी धमकी मिळाली आहे.

विमान कंपन्‍यांना नाहक भुर्दंड

विमानात बॉम्ब असल्याची माहिती मिळताच सदर विमान नियोजित विमानतळाऐवजी जवळच्या विमानतळावर उतरविण्यात येते. यामुळे केवळ इंधनाचा वापरच जास्त होत नाही तर विमानाची पुनर्तपासणी, प्रवाशांना हॉटेलमध्ये बसवण्याची आणि त्यांना त्यांच्या प्रवासाच्या ठिकाणी नेण्याची व्यवस्थाही करावी लागते. त्‍यामुळे एका विमानातील प्रवाशांवर सुमारे ३ कोटी रुपये खर्च येतो, अशी माहिती सूत्रांनी दिली.