गोव्यात ‘आयआयटी’साठी नव्या जागेचा शोध सुरू

अनिल पाटील

पणजी: सत्तरीतील जागेच्या वादावरून चर्चेत राहिलेल्या इंडियन इन्स्टिट्यूट ऑफ टेक्नॉलॉजी-गोवा अर्थात आयआयटीसाठीच्या नव्या जागेचा शोध सुरू झाला असून पुन्हा काणकोण, सांगेसह 3 जागांची पाहणी केली आहे. लवकरच त्याचा तपशील केंद्रीय मानव संसाधन मंत्रालयाला पाठवला जाईल, अशी माहिती शिक्षण सचिव रवी धवन यांनी दिली. केंद्र सरकारला ‘आयआयटी’सह गोव्याला शैक्षणिक हब बनवायची इच्छा असून केंद्र सरकार त्या पद्धतीने विचार करत आहे, असेही धवन यावेळी म्हणाले.

मंत्रिमंडळाच्या पहिल्याच बैठकीमध्ये आयआयटीच्या जागेसंदर्भात चर्चा झाली. यासाठी मुख्यमंत्री प्रमोद सावंत आग्रही असून केंद्र सरकारला गोवा शैक्षणिक हब बनवण्याची इच्छा असून यासाठी देशाची एकमेव फॉरेन्सिक युनिव्हर्सिटी, आंतरराष्ट्रीय दर्जाचे कायद्यासंबंधीचे अरबीट्रेशन संशोधन केंद्र उभारणीसाठी सुरवात झाली आहे.

फिल्म मेकिंग अभ्यासक्रम

राज्यात आंतरराष्ट्रीय चित्रपट महोत्सव कायमस्वरूपी स्थिरावल्याने फिल्म मेकिंगबरोबर या क्षेत्रातल्या नव्या तंत्रज्ञानाच्या उपयोगासंबंधीचे अभ्यासक्रम गोवा विद्यापीठात सुरू करण्यात येणार आहेत. याला यूजीसी आणि राज्य सरकारकडून मान्यता मिळाली आहे. त्यामुळे येत्या शैक्षणिक वर्षापासून यासंदर्भातील अभ्यासक्रम सुरू होण्याची शक्यता आहे.