Goa Crime News: डिचोलीत शाळकरी मुलाला मारहाण! शिक्षिकेवर गुन्हा दाखल

School boy beaten in bicholim; case has been filed against the teacher

डिचोलीतील एका प्राथमिक शाळेत एका शिक्षिकेकडून कोवळ्या मुलाला मारहाण करण्यात आल्याचा प्रकार समोर आला आहे. याप्रकरणी संबंधित मुलाच्या आईने डिचोली पोलिसांत तक्रार दाखल केल्यानंतर संशयित शिक्षिकेविरोधात गुन्हा दाखल करण्‍यात आला आहे.

पटसंखेच्या बाबतीत संपूर्ण राज्यात आघाडीवर असलेल्या आणि ‘ग्रीन शाळा’ म्हणून ओळखण्यात येणाऱ्या कारापूर पंचायत क्षेत्रातील एका शाळेत हा प्रकार घडला. ज्या शिक्षिकेविरोधात गुन्हा नोंद झाला आहे, ती पॅरा शिक्षिका असल्याची माहिती मिळाली आहे. मारहाण करण्यात आलेला मुलगा झरीवाडा-पडोसे येथील आहे.

दरम्यान, आपण मुलाला मारहाण केलेली नाही, असे संबंधित शिक्षिकेचे म्हणणे आहे. तसे तिने शाळेच्या प्रमुखांकडे स्पष्ट केल्याची माहिती मिळाली आहे. त्यामुळे या प्रकरणाचा गुंता वाढला आहे. पोलिस चौकशीनंतरच प्रकरणामागील सत्य उघड होईल. मात्र या प्रकारामुळे सध्या खळबळ माजली आहे.

मुस्‍कटात मारल्‍यामुळे डोके आपटले भिंतीला!

शनिवारी (ता. २५) स्वच्छतागृहातून बाहेर येताना संबंधित शिक्षिकेने आपल्या मुलाच्या मुस्‍कटात लगावली. त्यामुळे त्याचे डोके भिंतीच्या कडेला आपटून डोक्याला मुका मार बसला, असा दावा मारहाण झालेल्या मुलाची आई विश्रांती गावकर हिने केला आहे.

तशी तक्रार तिने पोलिसांत केली आहे. पोलिसांनी या तक्रारीची दाखल घेत संशयित शिक्षिकेविरोधात भारतीय दंड संहितेच्‍या ३२३ आणि बालहक्क कायद्याच्या ८ (२) या कलमांखाली गुन्हा नोंद केला आहे. वरिष्ठांच्या मार्गदर्शनाखाली पोलिस उपनिरीक्षक विकेश हडफडकर पुढील तपास करीत आहेत.