Sattari News : सत्तरी तालुक्यात पारंपरिक शिमगोत्सव सुरू; कोपार्डेत होळी उत्साहात

Sattari News :

वाळपई, सत्तोरी तालुक्याच्या पारंपरिक शिमगोत्सवाला सुरुवात झाली. सत्तरी तालुक्याच्या अनेक गावांमध्ये होळी साजरी करून इतर विधींनी सुरुवात होते. आज सकाळी काही ठिकाणी चोरोत्सवाला सुरुवात करण्यात आली.

पारंपरिक पद्धतीने काही ठिकाणी घराघरांत चोर फिरण्याची पद्धत आहे. आज सकाळी, सत्तरीच्या ग्रामीण भागात बहुतेक ठिकाणी सकाळच्या वेळी चोरोत्सव संपन्न झाला. घराघरांत चोर फिरले.

त्यावेळी त्यांची ग्रामस्थांनी विधिवत पूजा केली. तसेच झर्मे गावाचा चोरोत्सव रात्री उशिरा संपन्न झाला. कोपार्डे गावात सुध्दा रायच्या मंदिरात होळी घातल्यानंतर चोरोत्सव संपन्न झाला.

सत्तरी तालुक्यात सर्वच गावांमध्ये पारंपरिक शिमगोत्सव साजरा करण्यात येत असतो. या वेळी होळी साजरी करून रंगपंचमी साजरी करणे, घोडेमोडणी, पालखी, कलश उत्सव असे विविधांगी पारंपरिक उत्सव साजरे करण्यात येत असतात. यावेळी लहानापासून ते वृद्धापर्यंतच्या नागरिकांनी होळी उत्सवात सहभाग घेतला होता.

गावागावांत आता ढोल तासांचा आवाज घुमू लागला आहे. आज जग बदलत असलेले तरी आपली परंपरा जतन करण्याचे काम आजची पिढी चांगल्या पद्धतीने करत आहे.

एकूण पाच, सहा, सात दिवस चालणाऱ्या या शिमगोत्सवात होळी, चोरोत्सव, घोडेमोडणी, करवल्या त्यानंतर न्हावण होऊन रंगपंचमीने उत्सवाची सांगता होणार आहे.

करंझोळचा चोरोत्सव

आज मासोर्डे येथे संपन्न झालेल्या चोरोत्सवात श्री शांतादुर्गा रवळनाथ, तसेच श्री सातेरी कुळमाया, कोपार्डे येथील श्री ब्राम्हणी महामाया मंदिर आदी ठिकाणी चोरोत्सव संपन्न झाला. सर्वांनी ढोलताशाच्या जगताच सर्वांचे स्वागत केले. दरम्यान करंझोळ गावाचा चोरोत्सव ३० रोजी होणार आहे.