सत्तरीतील बंधारे बनले मद्यपींचे अड्डे! नदीपात्रात बाटल्यांचा खच आणि हुल्लडबाजी; उस्ते गावात मद्यपींचा धिंगाणा

वाळपई : सत्तरीतील नदीपात्रांत बुडून मृत्यूच्या घटना वाढत असतानाच दुसरीकडे येथील नद्यांवरील बंधाऱ्यांवर मद्यपींचा धुडगूस सुरू असल्याचे चित्र दिसत आहे. बंधाऱ्यांवर आंघोळीसाठी येणारे अनेकजण सोबत दारूच्या बाटल्या घेऊन येतात आणि दिवसभर मद्यपान करून धुडगूस घालतात. यामुळे स्थानिक नागरिकांना मोठा मनस्ताप सहन करावा लागत आहे.

नगरगाव पंचायत क्षेत्रातील उस्ते गावातील बंधाऱ्यांवर सध्या हे चित्र दिसून येत असून दिवसभर येथे मद्यपींचा धुमाकूळ सुरू असतो. उन्हाळ्यात अनेकांची पावले सत्तरीतील नद्यांकडे वळतात. नद्यांवरील बंधारे हे काहींसाठी धुडगूस घालण्याचे ठिकाण बनले असून दिवसभर दारू पिऊन येथे गैरवर्तन केले जाते.

स्थानिक पंच रामू खरवत यांनी या प्रकाराला आक्षेप घेतला असूनही कोणीही त्याकडे गांभीर्याने पाहत नसल्याचे ते सांगतात. एखादी दुर्घटना घडल्यास जबाबदार कोण, असा प्रश्नही त्यांनी उपस्थित केला आहे.सत्तरीतील नद्या व बंधाऱ्यांमुळे तालुक्याला पाणीसमृद्धी लाभली आहे. येथील शेती व कुळागरे या पाण्यावर अवलंबून आहेत. उन्हाळ्यात बंधारे अडवले जातात, ते शेतकऱ्यांच्या फायद्यासाठी; मात्र सध्या हे बंधारे स्थानिकांसाठी मनस्तापाचे केंद्र बनले आहेत.

बंधाऱ्यांमध्ये आंघोळीसाठी येणारे अनेकजण सोबत दारूच्या बाटल्या, खाद्यपदार्थ आदी घेऊन येतात. खाणे-पिणे झाल्यानंतर कचरा तेथेच टाकून ते निघून जातात. त्यामुळे नदीपात्राचे प्रदूषण वाढत असून परिसरात कचऱ्याची समस्या गंभीर बनली आहे. अनेक बंधारे सध्या कचऱ्याने तुंबलेले दिसत आहेत. वनक्षेत्रातही मोठ्या प्रमाणात कचरा आढळून येतो.

फेकलेल्या बाटल्या धोकादायक

अनेकजण नदीपात्रात तसेच परिसरात बाटल्या फोडून टाकतात. त्यामुळे हा परिसर धोकादायक बनला आहे. स्थानिक नागरिक तसेच जनावरांना याचा मोठा त्रास होत आहे. काच लागून जखमी होण्याचे प्रकार वारंवार घडत आहेत. यावर तातडीने कारवाई होणे आवश्यक आहे.

सरकारने दखल घ्यावी

बंधारे व नदी परिसरात दारू पिऊन दंगामस्ती करणाऱ्यांवर तसेच कचरा फेकणाऱ्यांवर कठोर कारवाई करावी, अशी मागणी स्थानिकांकडून होत आहे. तसेच बंधाऱ्यांमध्ये उतरण्यावर बंदी घालण्याची मागणीही करण्यात आली आहे.