Brahma Karmali: '..अखेर ग्रामस्थांच्या चेहऱ्यावर फुलले हसू'! गोव्यातील 'या' गावातून धावली कदंब बस; नागरिकांनी मानले आभार

वाळपई: सत्तरीच्या ग्रामीण भागात गेल्या अनेक वर्षांपासून वाहतूक व्यवस्था नसल्याने नागरिकांना त्रास होत होता. याची दखल घेऊन ब्रह्माकरमळीत कदंब बससेवा सुरू केल्याबद्दल श्री ब्रह्मदेव देवस्थान समितीतर्फे मंत्री विश्वजीत राणे व आमदार डॉ. दिव्या राणे यांचे ग्रामस्थांनी आभार मानले.

यावेळी झालेल्या कार्यक्रमात श्री ब्रह्मदेव देवस्थान सेवा समितीचे अध्यक्ष सागर सखाराम देसाई, नगरगाव पंचायतीचे माजी सरपंच वामनराव देसाई, सचिव महेंद्र गाडगीळ, सागर प्रभुदेसाई, अरविंद देसाई, काशिनाथ गावडे, महादेव दळवी, साई देसाई, मयंक दळवी, जय सावंत, नीळकंठ देसाई, मल्हार देसाई व इतर ग्रामस्थ उपस्थित होते.

माजी सरपंच वामनराव देसाई यांनी अनेक वर्षांची मागणी पूर्णत्वास येत असल्याबद्दल कदंब महामंडळाचे जाहीर आभार व्यक्त केले. ब्रह्मोत्सवाच्या व दत्तजयंतीच्या पूर्वी कदंब बससेवा सुरू झाल्याने भक्तगणांमध्ये उत्साहाचे वातावरण निर्माण झाले आहे. ही बससेवा वाळपईहून सायं. ५ वा. सुरू होऊन शिगणे येथे पोहोचेल व त्यानंतर ५.३५ वा. शिगणे ते वाळपईला रवाना होईल. पुन्हा ६.३० वा. वाळपईवरून करंझोळ येथे रवाना होईल. ग्रामीण भागातील नागरिकांना या कदंब बससेवेचा फायदा होईल.

स्थानिकांतून समाधान व्यक्त

कोरोना काळानंतर अनेक खासगी तसेच कदंब महामंडळाच्या बसेस बंद झाल्याने ग्रामीण भागातील नागरिक आणि विद्यार्थ्यांना मोठ्या वाहतूक समस्येला सामोरे जावे लागत होते. शेवटी नागरिकांच्या या मागणीची दखल घेत वाळपई-शिंगणे-करंजोळ या मार्गावरील बससेवा पुन्हा सुरू करण्यात आल्यामुळे स्थानिकांनी समाधान व्यक्त होत आहे.

वामनराव देसाई, नगरगाव पंचायतीचे माजी सरपंच

गावात वाहतुकीची सोय असणे अत्यंत गरजेचे आहे. गरीब नागरिक आणि विद्यार्थी हे अजूनही बसप्रवासावर अवलंबून आहेत. बस नसल्याने त्यांना प्रचंड अडचणींना सामोरे जावे लागत होते. पूर्वी आपली स्वतःची बस होती, त्यामुळे बस सेवेअभावी होणाऱ्या त्रासाचा आम्हाला अनुभव आहे. आता पुन्हा बससेवा सुरू झाल्याने मोठा दिलासा मिळाला आहे.