Goa Hit And Run Case: शिरसई हिट अ‍ॅण्ड रन! साताऱ्याचा व्यक्ती ठार, झारखंडच्या टॅक्सी चालकाला अटक

Goa Hit And Run Case

शिरसई येथे अज्ञात वाहनाने दिलेल्या धडकेत सातारा, महाराष्ट्र येथील 44 वर्षीय व्यक्तीचा मृत्यू झाला होता. याप्रकरणी कोलवाळ पोलिसांनी झारखंडच्या टॅक्सी चालकाला अटक केली आहे.

शिरसई ग्रामपंचायत समोर (बुधवारी) अज्ञात वाहनाने दिलेल्या धडकेत राजेंद्र चव्हाण (वय 44, रा. सातारा, महाराष्ट्र) या व्यक्तीचा मृत्यू झाला होता.

राजेंद्र चव्हाण त्यांच्या इतर साथीदारांसोबत शिरसाई येथे एका घराचे रंगकाम करत होते. दुपारी तीनच्या सुमारास जेवण केल्यानंतर फेरफटका मारण्यासाठी चव्हाण बाहेर आले, त्यांचे इतर सहकारी तिथेच विश्रांती करत होते.

दरम्यान, चव्हाण यांना अज्ञात वाहनाने धडक दिल्यानंतर ते जखमी अवस्थेत रस्त्याच्या शेजारी पडले होते. घटनेची माहिती मिळताच त्यांचे सहकारी घटनास्थळी दाखल झाले व चव्हाण यांना उपचारासाठी रुग्णालयात दाखल करण्यात आले. मात्र, डॉक्टरांनी त्यांना मृत घोषित केले.

अपघाताची माहिती कोलवाळ पोलिसांना मिळताच त्यांनी घटनास्थळी दाखल होत, पंचनामा केला. याठीकाणी असलेले सीसीटीव्ही तपासल्यानंतर अपघाताचा व्हिडिओ समोर आला असून, यात एका भरधाव कार चव्हाण यांना जोराची धडक देऊन फरार झाल्याचे दिसून येत आहे.

याप्रकरणी कोलवाळ पोलिसांनी अभिषेक वर्मा (झारखंड) याला अटक केली असून, अधिक तपास सुरु आहे.