Ro Ro Ferryboat: गोव्यात आणखी एका मार्गावर होणार 'रो रो फेरी' सुरु, किती असणार क्षमता? कधी होणार सुरु? जाणून घ्या..

पणजी: तीन महिन्यांपूर्वी रायबंदर-चोडण जलमार्गावर रोल-ऑन रोल-ऑफ (रो-रो) फेरीबोटीच्या यशस्वी सेवेनंतर आता राज्य सरकारने आता दिवाड-सापेंद्र मार्गावर मिनी रो-रो फेरीबोट सेवा सुरू करण्याची तयारी सुरू केली आहे. पुढील वर्षी एप्रिलमध्ये ही सेवा सुरू होण्याची शक्यता आहे.

रायबंदर-चोडण मार्गावर रो-रो ही खासगी भागिदारीतून सेवा सुरू झाली आहे. या सेवेला मिळणाऱ्या प्रतिसादामुळे पुढील वर्षी आणखी एक सेवा सुरू करण्याचा विचार असल्याचे मंत्री सुभाष फळदेसाई यांनी सांगितले.

नुकताच वॉटर मेट्रोसाठी कोची मेट्रोचे पथक पाहणी करून गेले आहे. हा प्रकल्प मार्गी लागण्यास वेळ लागू शकतो, त्यामुळे तत्पूर्वी आणखी एका मार्गावर रो-रो फेरीबोट सेवा सुरू व्हावी, अशी इच्छा आहे.

५० प्रवासी क्षमता

सापेंद्र-दिवाड या मार्गावर सुरू करण्यात येणाऱ्या दोन रो-रो फेरीबोट्स आकाराने लहान असणार आहेत. या फेरीबोटीत ८-९ चारचाकी, ३० दुचाकी आणि जवळजवळ ५० प्रवासी बसू शकणार आहेत.