Mapusa Roads: हेल्पलाईनवर खड्ड्यांचा फोटो पाठवा, स्वखर्चाने खड्डे बुजवणार; सामाजिक कार्यकर्ते संजय बर्डेंचा पुढाकार

म्हापसा : शहरात भूमिगत वीज वाहिनीच्या कामामुळे ठिकठिकाणी रस्ते खोदले होते. मात्र, जिथे कामे पूर्णत्वास आली, तेथील रस्ते पूर्ववत केले नाहीत. परिणामी, खड्ड्यांमुळे लोकांना दररोज तारेवरची कसरत करावी लागत असून चार दिवसांवर गणेशोत्सव आला आहे. चतुर्थीच्या काळात लोकांना होणारा त्रास कमी करण्यासाठी सामाजिक कार्यकर्ते संजय बर्डे पुढे सरसावले आहेत. संजय बर्डेंनी म्हापसेकरांसाठी ‘रस्ता हेल्पलाईन क्रमांक’ जारी केला आहे.

या हेल्पलाईनवर खड्ड्यांचा फोटो व माहिती पाठवावी. यावेळी संजय बर्डे हे स्वखर्चाने खड्डे बुजविणार असल्याचे त्यांनी सोमवारी पत्रकार परिषदेत जाहीर केले. यावेळी सीतेश मोरे, विनेश नाईक, सुरज कांबळी हे उपस्थित होते.

आमदारांना दिसेना लोकांचा त्रास!

म्हापसा मतदारसंघाच्या आमदारांना देखील लोकांना होणारा त्रास दिसत नाही. त्यामुळे मी स्वखर्चाने रस्त्यांवरील खड्डे बुजविण्यासाठी पुढाकार घेतला आहे. ज्या परिसरात गणेश विसर्जन केले जाते, त्या भागांतील रस्त्यांवरील खड्डे पहिल्यांदा बुजविले जातील. तसेच लोकांच्या तक्रारीनुसार रस्त्यांवरील खड्डे बुजविले जातील, असेही बर्डे म्हणाले.