Sanguem: रस्त्यावर चिखल, सांडपाण्याच्या दुर्गंध आणि तिथेच भरतोय आठवडी बाजार; सांगेतील दुरावस्था, विक्रेते-ग्राहक हैराण

सांगे: येथे दर बुधवारी पालिकेचा आठवडी बाजार सध्या विविध संकटांनी ग्रासला आहे. येथील उपजिल्हाधिकारी कार्यालयाच्या मागील मोकळ्या जागेत भरतो, पण सध्या पावसामुळे लोकांना चिखलातून बाजारहाट करावी लागते.

पाच वर्षांपूर्वी हा बाजार पालिकेच्या अंतर्गत रस्त्यावर भरत होता. त्यावेळी वाहन चालकांना अडथळा होत असल्यामुळे हा बाजार मासळी मार्केटला टेकून उपजिल्हाधिकारी कार्यालयाच्या मागील मोकळ्या जागेवर भरविण्यात येऊ लागला. त्यावेळी पालिकेने या बाजारासाठी शेड बांधून देण्याचे आश्‍वासन दिले होते. मात्र गेल्या पाच वर्षांत या बाजारात कोणतीच सुधारणा झालेली नाही. ऊन पावसात बसून व्यापाऱ्यांना व्यापार करावा लागतो.

आज जिथे बाजार भरला जातो ती जागा पालिकेच्या मालकीची असून नगराध्यक्ष संतीक्षा गडकर यांच्या प्रभागात मोडते. त्यामुळे लोक पालिका व नगराध्यक्षांना दुषणे देत आहेत. बाजारहाट करण्यासाठी येणाऱ्या ग्राहकांना चिखलातून फिरावे लागते. अर्धा दिवसाचा हा बाजार असला तरी गलिच्छ वातावरणात खरेदी विक्री केली जाते.

नाइलाजाने ग्राहकांना चिखलात बसून भाजी व इतर साहित्य खरेदी करावे लागते. तसेच मासळी मार्केटमधील सांडपाणी गटारातून वाहत असल्यामुळे विक्रेत्यांना व ग्राहकांना कायम दुर्गंधी सहन करावी लागते. उपजिल्हाधिकारी कार्यालयाखाली गावठी भाजी विक्रेत्यांसाठी खास सोपे तयार करण्यात आले होते, पण तिथे गळती होत असल्यामुळे विक्रेत्यांना उघड्यावर बसून विक्री करावी लागते.

पालिकेने लक्ष द्यावे

गेल्या पाच वर्षांत विक्रेत्यांना केवळ आश्‍वासनेच मिळाली आहेत. पालिका मंडळाचे हे शेवटचे वर्ष आहे, त्यामुळे या बाजाराकडे हे पालिका मंडळ लक्ष देणार का, असा प्रश्‍न उपस्थित केला जात आहे. मासळी मार्केटनजीक शेड उभारल्यास विक्रेते व ग्राहकांच्या ते सोयीचे ठरणार आहे.