गोव्यातील एसीजीएल कंपनीचा पगारवाढ प्रश्न मिटला

पिसुर्ले: गेल्या कित्येक दिवसांपासून ऐरणीवर आलेला एसीजीएल कंपनीच्या कामगाराच्या पगारवाढीचा मुद्दा संपुष्टात आला असल्याची खास सुत्रांकडून माहिती मिळाली. सदर कामगारांना सन 2018 पासून पगारवाढ मिळाली नव्हती, त्यामुळे कामगार आक्रमक बनले होते. यापुर्वी पाच दिवस संप पुकारून कंपनी व सरकारला जागे केले होते, परंतू कंपनी व्यवस्थापन कोणतीच भूमिका घेत नसल्याने संपाची आणखीन त्रीव करण्यासाठी कामगार संघटनेच्या वतीने दि 2 रोजी पासून बेमुदत संपावर जाण्याचा इशारा कंपनीला दिला होता. (ACGL worker Salary Issue)

याचीच दखल घेऊन हे प्रकरण आणखीन चिघळू नये यासाठी मुख्यमंत्री डॉ प्रमोद सावंत यांच्या आदेशानुसार कामगार आयुक्तांनी हस्तक्षेप करून कंपनी व्यवस्थापन व कामगार संघटना यांच्या सोबत गेल्या शुक्रवारी बैठक घेऊन काही महत्त्वाच्या विषयावर चर्चा घडवून आणली होती. त्यामुळे हे प्रकरण मिटणार अशी शक्यता निर्माण झाली होती.

त्याप्रमाणे सदर कामगारांच्या पगारवाढीच्या मुद्द्यावर दि 28 फेब्रुवारी तसेच दि 1 मार्च रोजी कामगार आयुक्तांनी बैठका घेऊन सुवर्णमध्य असा तोडगा काढण्याचा प्रयत्न केला होता. त्या प्रयत्नांना यश आले असून रात्री उशिरा कंपनी व्यवस्थापन व कामगार संघटना यांच्यात मुख्यमंत्री डॉ प्रमोद सावंत (Pramod Sawant) यांच्या उपस्थितीत पगारवाढीच्या करारांवर स्वाक्षरी होणार असल्याचे समजले आहे. या कराराचा सविस्तर तपशील मिळू शकला नाही.

सदर कंपनीच्या (Company) कामगाराचा संप होणार असल्याने होंडा औद्योगिक वसाहतीत कार्यरत असलेल्या लघुउद्योजक व कंत्राटी कामगारा मध्ये चिंता निर्माण झाली होती. परंतु आता बऱ्याच दिवसांपासून प्रलंबित असलेल्या विषयाला पुर्ण विराम मिळाला आहे.