Sanquelim Chaitrotsav: साखळीत चैत्रोत्सवाला उत्साहात प्रारंभ, सात दिवस उत्सव; 3 एप्रिल रोजी रंगणार ‘वीरभद्रा’चा थरार

साखळी: विठ्ठलापूर-साखळी येथील श्री विठ्ठल-रखुमाई मंदिरात साजऱ्या होणाऱ्या चैत्रोत्सवाला शनिवार, २८ रोजीपासून प्रारंभ होणार आहे. यावर्षी सात दिवस हा उत्सव चालणार असून ३ एप्रिल रोजी पहाटे प्रसिध्द वीरभद्राचा थरार अनुभवण्याची संधी लोकांना मिळणार आहे.

दरवर्षी साखळीत होणारा हा प्रसिद्ध आणि चैतन्यदायी चैत्रोत्सव म्हणजे एक पर्वणीच असून हजारोंच्या संख्येने भाविक ता उत्सवात सहभागी होत असतात. दर दिवशी श्री विठ्ठल-रखुमाई व सत्यभामाला वेगवेगळ्या स्वरूपात सजविले जाते. विविध अवतार पाहायला मिळतात. दररोज रात्री मंदिराच्या बाजूला खास उभारलेल्या मंडपात दशावतारी नाट्यप्रयोग सादर केले जातात.

अखेरच्या दिवशी रात्री या दशावतारी नाट्यमंडळीकडून ‘वीरभद्रा’चा भाग लावला जातो. हा भाग संपल्यावर पहाटे त्याच मंडपात वीरभद्र सोहळा होतो. हा सोहळा पाहण्यासाठी गोव्याशेजारील राज्यातील भाविक गर्दी करीत असतात.

या उत्सवानिमित्त विठ्ठलापूर मंदिर परिसरात मोठ्या प्रमाणात फेरीवाल्यांनी आपापली दुकाने थाटली आहेत. लहान-सहान हॉटेल्स, खेळण्याची दुकाने, आईस्क्रीम दुकाने थाटण्यात आलेली आहेत. देवस्थान समितीकडूनही सर्व तयारी पूर्ण झाली आहे.