CM Pramod Sawant: कर्जबुडव्यांना बसणार चाप; ठगांवर नियंत्रणासाठी ‘ॲप’

CM Pramod Sawant: सहकारी पतसंस्था तसेच बँकांकडून कर्जे घेऊन नंतर ती बुडविणाऱ्या ठग मनोवृत्तीच्या कर्जबुडव्यांवर नियंत्रण ठेवण्यासाठी सहकार खाते येत्या 31 मार्चपर्यंत अनोखे ‘ॲप’ आणणार आहे.

त्याद्वारे ठरावीक व्यक्ती किती पतसंस्थांमध्ये कर्जदार आहे आणि त्याच्या कर्जाची विद्यमान स्थिती काय आहे, याची माहिती मिळेल. त्यामुळे पतसंस्थांना अशा संशयास्पद कर्जदाराबाबत सतर्कता बाळगण्यास मदत होईल, अशी घोषणा मुख्यमंत्री डॉ. प्रमोद सावंत यांनी साखळी येथे केली.

उद्‌घाटनप्रसंगी मुख्यमंत्री डॉ. प्रमोद सावंत बोलत होते. यावेळी सहकारमंत्री सुभाष शिरोडकर, नगराध्यक्ष रश्मी देसाई, संस्थेचे अध्यक्ष अनिल काणेकर, उपाध्यक्ष दत्ताराम पोकळे, संचालक प्रदीप मळीक, प्रेमानंद चावडीकर, संजय देसाई, रामनाथ काणेकर, गीता शिरोडकर, श्रद्धा सुर्लकर, सरव्यवस्थापक कांचन पर्येकर आदी उपस्थित होते.

या सोहळ्यात मुख्यमंत्री डॉ. सावंत यांच्या हस्ते सुशांत पोकळे, दत्तगुरू जोशी, अनुप देसाई, योगेश दिवानी, प्रकाश शेट्ये यांचा गौरव करण्यात आला. स्वागत संस्थेचे अध्यक्ष अनिल काणेकर यांनी केले. सूत्रसंचालन राधिका कामत सातोस्कर यांनी, तर आभार उपाध्यक्ष दत्ताराम पोकळे यांनी मानले.

‘साखळी अर्बन’चे विकासात योगदान

साखळी अर्बनचे पतसंस्थेचे साखळीच्या विकासात मोठे योगदान असून अनेकांना आवश्यक त्यावेळी मदत केली आहे. याच कार्यातील विश्वासामुळे आज ही संस्था यशोशिखरावर पोहोचली आहे. या संस्थेने गरजवंतांना यापुढेही मदतीचा हात देताना अंत्योदय तत्त्वावर काम करावे, असे मुख्यमंत्री म्हणाले.