नावेली हायवे जंक्शनवर सुरक्षा उपाय योजना; उल्हास तुयेकरांची सूचना

मडगाव: नावेलीचे आमदार उल्हास तुयेकर यांनी काल सकाळी संबंधित सरकारी अधिकाऱ्यांसमवेत नावेली बायपास जंक्शनजवळील रस्त्याची पाहणी केली व तेथील वाढते अपघात टाळण्यासाठी त्वरित उपाय योजण्याच्या सूचना केल्या. स्थानिक कार्यकर्त्यांबरोबरच यावेळी सार्वजनिक बांधकाम खाते राष्ट्रीय महामार्ग विभाग, बायपास ठेकेदाराचे प्रतिनिधी, कन्सल्टन्सीचे प्रतिनिधी तसेच वाहतूक पोलिस निरीक्षक गौतम साळुंखे उपस्थित होते.

यावेळी तुयेकर यांनी रस्त्याचा तो भाग तसेच बायपास जंक्शन फिरून पाहिले असता जंक्शन बांधले तरी तेथे दिशादर्शक फलक नसल्याने वाहनचालकांचा गोंधळ उडतो व त्यातून अपघात घडतात असे आढळून आले व तुयेकर यांनी त्वरित सिग्नल व दिशादर्शक फलक उभारण्याची सूचना केली. हे वाहतूक बेट सदोष असल्याच्या लोकांच्या तक्रारी असल्याने त्याची दखल घेऊन त्यात सुधारणा करण्याचा निर्णयही घेतला गेला.