Goa Crime: रशियन महिलेने केली गांज्याची शेती, जामीनावर बाहेर, रशियातून व्हिडिओ कॉन्फरन्सिंगद्वारे होणार सुनावणीत सहभागी

म्हापसा: विशेष अंमलीपदार्थ प्रतिबंधक कायद्यातील (एनडीपीएस) गुन्ह्यात आरोपी असलेल्या रशियन महिला विक्टोरिया फोमेनको हिला रशियात परतण्याची परवानगी म्हापसा येथील अतिरिक्त सत्र न्यायालयाने दिली आहे. फोमेनको व्हिडिओ कॉन्फरन्सिंगद्वारे खटल्याच्या सर्व सुनावणीत सहभागी होणार असून, न्यायालयाने तिला सशर्त मंजुरी दिली आहे.

फोमेनको हिला ११ एप्रिल २०१९ रोजी अंमलीपदार्थ विरोधी पथक, पणजी यांनी ११८ ग्रॅम गांजा बाळगल्याप्रकरणी आणि गांजाची शेती केल्याच्या आरोपाखाली अटक केली होती. तिला २९ एप्रिल २०१९ रोजी जामिनावर मुक्त करण्यात आले असून, तिने जामिनासाठी आवश्यक हमीपत्र देखील सादर केले आहे. तिच्याकडे वैध रशियन पासपोर्ट व टुरिस्ट व्हीसा देखील आहे.

फोमेनकोने १० जून २०२५ रोजी न्यायालयात दाखल केलेल्या अर्जात आपले पतीशी कोणतेही संबंध नाहीत, असे नमूद केले आहे. सध्या ती तिच्या चार वर्षांच्या मुलीसह (फोमेनको मिरास्लावा ग्रिगोरीएवना, जन्म – ४ सप्टेंबर २०२०) भारतात राहते.

आर्थिक आधार, रोजगार, किंवा कोणतीही सामाजिक सुरक्षा नसल्याने आपल्यावर उपजीविकेचा प्रश्न निर्माण झाला आहे. रशियात माझे कुटुंब स्थिर असून, तिथे निवारा, रोजगार आणि सामाजिक आधार मिळू शकतो असे त्यांनी अर्जात स्पष्ट केले. मुलीच्या संगोपनासाठी आणि शिक्षणासाठी ती रशियात परतण्यास इच्छुक असल्याचे देखील तिने अर्जात स्पष्ट केले.