पणजीच्या महापौरपदी रोहित मोन्सेरात, तर उपमहापौरपदी संजीव नाईक

पणजी : पणजी महापालिकेच्या महापौरपदी बाबूश मोन्सेरात यांचे पुत्र रोहित मोन्सेरात यांची बिनविरोध निवड झाली आहे. पणजीच्या महापौरपदासाठी बुधवारी निवडणूक झाली, यात रोहित मोन्सेरात यांचा एकच अर्ज दाखल असल्याने त्यांनी सलग दुसऱ्यावेळी पणजीचा महापौर होण्याचा मान मिळाला आहे. (Rohit Monserratte News Updates)

पणजी (Panjim) महापालिकेच्या महापौर आणि उपमहापौरपदासाठी आज बुधवारी 30 मार्च रोजी निवडणूक झाली. यात महापौरपदी रोहित मोन्सेरात, तर उपमहापौरपदी संजीव नाईक यांची बिनविरोध निवड करण्यात आली आहे. प्रत्येकी एकच अर्ज आल्यामुळे दोघांचीही बिनविरोध निवड झाली आहे. केवळ एकच अर्ज आल्याने रोहित मोन्सेरात यांच्या नावाची केवळ औपचारिक घोषणाच बाकी होती.

पणजी महापालिकेचे उपमहापौर वसंत आगशीकर यांनी अर्ज दाखल केला नाही. मात्र त्यांच्या जागी संजीव नाईक यांनी उपमहापौरपदासाठी अर्ज केला होता. ही निवडणूक (Election) जिंकत मोन्सेरात कुटुंबाने पणजीवर आपलं निर्विवाद वर्चस्व सिद्ध केलं आहे. आमदार बाबूश मोन्सेरात समर्थक गटाकडे 25 नगरसेवक, तर विरोधी नगरसेवकांची संख्या फक्त 5 आहे. बाबूश मोन्सेरात (Babush Monserratte) यांचा गोव्याच्या कॅबिनेटमध्ये समावेश करण्यात आला आहे. त्यामुळे आता बाबूश यांना कोणतं खातं मिळणार याकडे सर्वांचं लक्ष लागलेलं आहे.