डिचोली बाजारात दुकानाला आग लागल्याने गोंधळ

डिचोली : डिचोली बाजारातील एका दुकानाला आग लागून हजारो रुपयांचे नुकसान झाले आहे. अग्निशमन दलाच्या जवानांनी वेळीच धावपळ करून आग नियंत्रणात आणल्याने बाजूची अन्य दुकाने सुरक्षित राहिली. त्यामुळे मोठा अनर्थ टळला आहे. (Shop Fire in Bicholim News Updates)

डिचोली (Bicholim) बाजारपेठेत बुधवारी पहाटे ही घटना घडली. आग नेमकी कशी लागली, ते समजू शकले नाही. फूल बाजारातील मागच्या बाजूने असलेल्या दुकानांपैकी प्रमोद नाईक यांच्या दुकानाला अचानक आग लागली. डिचोली अग्निशमन दलाला (Fire Brigade) या घटनेची माहिती मिळताच दलाच्या जवानांनी बंबासहित घटनास्थळी धाव घेतली. त्यावेळी बंद दुकानातून धूर येत असल्याचे दिसून आले.

अग्निशमन दलाच्या जवानांनी दुकानाचे शटर उघडून आग (Fire) विझवली. त्यामुळे या दुकानाला टेकून असलेली एका रांगेतील अन्य दुकाने आगीपासून वाचली. आगीचं कारण अद्याप समजू शकलेलं नाही. आग वेळीच विझवली नसती तर रांगेतील दुकानांना आगीची झळ पोहोचून लाखोंचं नुकसान होण्याची भीती होती. मात्र अग्निशमन दलामुळे मोठा अनर्थ टळला आहे.