Konkani Language: रोहन खंवटे म्हणाले, कोकणी टिकवण्यासाठी 'या' गोष्टी करा

Konkani Language: जर वाचन केले नाही तर आपली बौद्धिक क्षमता कमकुवत होते. आपले अस्तित्त्व सांभाळण्यासाठी वाचन महत्त्वाचे आहे त्याचप्रमाणे कोकणी सांभाळण्यासाठी वाचन करणे गरजेचे आहे,असे प्रतिपादन पर्यटन मंत्री रोहन खंवटे यांनी केले.

संस्कृती भवन पाटो येथे आयोजित दाल्गादो पुरस्कार वितरण सोहळ्यात ते प्रमुख पाहुणे या नात्याने बोलत होते. यावेळी दाल्गाद कोकणी अकादमीचे अध्यक्ष विन्सी कार्दोज, दानियल डिसोजा व्यासपीठावर उपस्थित होते.

ते पुढे म्हणाले,की आपल्या मातृभाषेशी जवळीक साधली नाही, तर येणाऱ्या पिढीला ती समजणार नाही.

तियात्र, कातारांच्या माध्यमातून रोमी कोकणी आपले अस्तित्व टिकवून असल्याचे त्यांनी सांगितले. वि दाल्गादो कोकणी अकादमीच्या वतीने सायमन फर्नांडिस, पीटर कार्दोजो, फिलिक्स डिक्रुज, थॉमस डिकोस्टा, तियोतीन कोस्ता, फिलोमिना फ्रान्सिस्को आदींना पुरस्काराने सन्मानित करण्यात आले.

रोमी लिपीतून शिक्षण द्यावे !

नव्या शिक्षण धोरणात प्रादेशिक भाषांमधून शिक्षण देण्यास अधिक प्राधान्य देण्यात आले आहे. त्यामुळे कोकणी भाषा देवनागरी लिपीसहित रोमी लिपीतूनही राज्यातील शाळांमधून शिक्षण व्हावे.तरच कोकणी गावागावत पोहोचेल, तिचा विकास होईल.

रोमी लिपीतून शिक्षण देता यावे , यासाठी पुस्तके तयार करण्याचे काम सुरू असून त्यासाठी सरकारच्या पाठिंब्याची देखील गरज आहे,असे दानियल डिसोजा यांनी सांगितले.