Goa Swimming Pool: सडा जलतरण तलावात परप्रांतीय युवकांची हुल्लडबाजी

Goa Swimming Pool: मुरगाव सडा येथील राज्य क्रीडा व युवा व्यवहार संचालनालयाच्या जलतरण तलावात काही परप्रांतीय युवक येऊन मनमानी करून आंघोळ करीत असल्याची तक्रार पोलिसांत दाखल करण्यात आली आहे.

जलतरण तलावासमोरच असलेल्या गोवा पुनवर्सन मंडळाच्या वसाहतीतील काही युवक, राजकीय दबाव वापरून जलतरण तलावात येऊन आंघोळ करीत असल्याचे संचालनालयाच्या वरिष्ठ अधिकाऱ्यांमार्फत सांगण्यात येत आहे.तसेच पुढील महिन्यात गोव्यात होणाऱ्या राष्ट्रीय क्रीडा स्पर्धांच्या तयारीसाठी, सडा येथील राज्य सरकारच्या जलतरण तलावाची पाहणी करण्यासाठी बेंगळुरू येथील राष्ट्रीय क्रीडा स्पर्धेचे अधिकारी आले होते, असे संचालनालयाच्या अधिकाऱ्यांकडून सांगण्यात आले.

चिखली ‘साग’, टिळक मैदानची राष्ट्रीय स्पर्धेसाठी निवड

राष्ट्रीय क्रीडा स्पर्धेसाठी मुरगाव तालुक्यातील दाबोळी चिखली साग मैदानावरील इनडोअर स्टेडियमवर स्क्वॅश, बॅटमिंटन व वास्को येथील टिळक मैदान फुटबॉल स्पर्धेसाठी निवडण्यात आल्याची माहिती ‘साग’च्या वरिष्ठ अधिकाऱ्यांकडून देण्यात आली आहे.

तलाव परिसरात पोलिसांची अहोरात्र गस्त

पोलिसांनी गांभीर्य लक्षात घेऊन जलतरण तलावाकडे अहोरात्र गस्त वाढविली आहे. तसेच तलावाच्या क्षेत्रातील घरांलगत मोठी झाडे येत असून संबंधितांनी त्या झाडांच्या फांद्या कापाव्यात, अशी मागणी संचालनालयातर्फे करण्यात आली आहे. तसेच जलतरण तलावाच्या सुरक्षेसाठी २४ तास सुरक्षा रक्षक नेमण्याची मागणी केली आहे. ऑक्टोबर २५ पासून राज्यात '' राष्ट्रीय क्रीडा स्पर्धा '' होणार आहे. बेंगळुरू येथील अधिकाऱ्यांनी जलतरण तलावाची पाहणी केली होती.कदाचित सडा जलतरण तलावाचा राष्ट्रीय क्रीडा स्पर्धेसाठी उपयोग केला जाईल.