Assagao Road: आसगावात युद्धपातळीवर रस्त्यांची डागडुजी सुरू!

शिवोली: आसगाव येथील खासगी बस मालकांनी येथील रस्त्यांच्या दुरावस्थेवर आक्रोश आंदोलन करून आमरण उपोषणाचा इशारा दिल्यानंतर या भागातील मुख्य रस्त्याच्या डागडुजीचे काम युद्धपातळीवर आज (सोमवारी) हाती घेण्यात आले.

दरम्यान, या भागातील खासगी बसमालक, कंडक्टर्स तसेच चालकांनी शनिवारी एकत्रित येऊन भर रस्त्यात साचलेल्या पाण्यात बसून आक्रोश आंदोलन छेडले होते, यावेळी रस्त्याच्या दुरुस्तीसाठी सरकारला आठ दिवसांचा अल्टिमेटम देऊन बसमालक श्‍याम गोवेकर व इतरांनी स्थानिक पंचायत कार्यालयासमोर आमरण उपोषणास बसण्याचा इशारा देण्यात आला होता.

दरम्यान, आसगावचे सरपंच हनुमंत नाईक तसेच शिवोलीच्या आमदार दिलायला लोबो यांनी याबाबतीत तात्काळ पावले उचलून संबंधित सार्वजनिक बांधकाम खात्याच्या अधिकाऱ्यांना येथील खड्डेमय रस्त्यांची डागडुजी त्वरित सुरू करा, असे आदेश दिले होते, अशी माहिती सूत्रांनी दिली. दरम्यान, रस्त्याच्या दुरावस्थेवरून सरकारला उपोषणाचा इशारा दिलेल्या बस मालक श्‍याम गोवेकर यांनी रस्ता डागडुजीच्या काम स्वागत केले.