River Rafting Goa : उस्तेच्या नदीपात्रात जलक्रीडांचा थरार सुरू

River Rafting Goa : सत्तरी तालुक्यात नगरगाव ग्रामपंचायत क्षेत्रातील उस्ते गावातून पर्यटन विकास महामंडळातर्फे व्हाईट वॉटर राफ्टिंग या साहसी जलक्रीडा खेळाला नुकतीच सुरवात करण्यात आली आहे. त्यामुळे पर्यटकांच्या उत्साहाला उधाण आले आहे. नगरगाव सरपंच संध्या खाडीलकर यांच्या शुभहस्ते श्रीफळ वाढवून बोटीची पूजा करून खेळाला प्रारंभ करण्यात आला. यावेळी उपसरपंच रामू खरवत, पंच राजेंद्र अभ्यंकर आदींची उपस्थिती होती.

स्व. मनोहर पर्रीकर यांनी जलखेळांचे उद्‌घाटन २०१२ साली केले होते. पर्यटकांना वाळपईतून वाहनाची चोख व्यवस्था केली जाते. सकाळी ९.३० वाजता व दुपारी २.३० वाजता अशा दोन सत्रांत हा खेळ खेळला जातो. भाजप सरकारने सुरू केलेला हा जलसाहसी प्रकल्प चांगला ठरत आलेला आहे. यातून काही प्रमाणात नगरगाव पंचायतीला महसूलही प्राप्त होतो आहे, असे सरपंच संध्या खाडीलकर यांनी सांगितले.

पंच राजेंद्र अभ्यंकर म्हणाले की, व्हाईट वॉटर राफ्टिंगचा स्थानिक वाहनधारक व्यावसायिकांना चांगला फायदा होतो आहे. गाडीचे भाडे मिळून रोजगार मिळतो आहे. तसेच स्थानिक हॉटेल्स व्यावसायिकांनाही जेवणाच्या माध्यमातून लाभ झालेला आहे.

योग्य सुरक्षा, मार्गदर्शन

या जलक्रीडेसाठी अगदी साहसी अनुभवी कर्मचारी नियुक्त करण्यात आलेले आहेत. पर्यटकांना सुरक्षेसाठी हेल्मेट, अंगात परिधान करण्यास जॅकेट दिले जाते. तसेच जलक्रीडेवेळी कोणत्या गोष्टींची पाळणूक करावी लागते याची माहिती सुरवातीला दिली जाते. या खेळावेळी म्हादई नदीचे सौंदर्य, वनराई, उंच झाडांचा नजराणा, जलद वाहणाऱ्या फेसाळयुक्त पाण्याचा थरारक अनुभव घेता येतो.