Hill Cutting : रायबंदर डोंगर कापणी परवाना 'एनजीपीडीए'कडून मागे; ॲड. आयरिश रॉड्रिग्ज यांनी केली होती तक्रार

Illegal Hill Cutting : कदंब पठावरील रायबंदरच्या भागात येणाऱ्या डोंगर कापणी प्रकरणात सर बायोटेक इंडिया प्राव्हेट लिमिटेडला दिलेली परवानगी उत्तर गोवा नियोजन आणि विकास प्राधिकरणाने (एनजीपीडीए) मागे घेतली आहे. डोंगर कापणी केल्यासंबंधी एनजीपीडीने कंपनीला अनियमित आणि नियमांचे उल्लंघन केल्याची कारणे दाखवा नोटीस बाजवली होती.

सदर प्रकरणात आरटीआय कार्यकर्ते ॲड.आयरिश रॉड्रिग्ज यांनी कदंब पठारावरील रायबंदरच्या भागात बेकायदेशीररीत्या डोंगर कापणी होत असून ही दूर चोडण येथून देखील दिसत असल्याची तक्रार नगर नियोजन खात्यात केली होती. याची गंभीर दखल घेऊन नगर नियोजन मंत्री विश्‍वजित राणे यांनी काम सुरू असलेल्या भागाची पाहणी केली होती.

येथील उतरणीवरील क्षेत्र ना विकोस क्षेत्र केला जाईल, तसेच बांधकामासाठी कशी काय परवानगी देण्यात आली याची चौकशी करणार असल्याचे राणे यांनी सांगितले होते.

या घटनेनंतर एनजीपीडीएचे सदस्य सचिव आर. पंडिता यांची प्राधिकरणातून उचलबांगडी करण्यात आली होती. गेली अनेक वर्ष ते एनजीपीडीएमध्ये ठाण मांडून बसले होते.

एनजीपीडीएच्या अध्यक्षा आमदार जेनिफर मोन्सेरात असल्या तरी त्यांचे पती मंत्री बाबूश मोन्सेरात यांचा कथित डोंगर कापणीला छुपा पाठिंबा असल्याचे बोलले जात आहे.