Minister Babush Monserrate: अतिक्रमणाची प्रकरणे वर्षभरात निकाली काढू

Minister Babush Monserrate: महसूलमंत्री बाबूश मोन्सेरात यांनी या अधिवेशनात कोमुनिदादच्या जमिनींवरील बेकायदा अतिक्रमणांची प्रकरणे वर्षभरात निकाली काढण्याचे आश्वासन दिले. अशा बेकायदेशीर गोष्टींवर कठोर कारवाई केली जाईल, असे मोन्सेरात यावेळी म्हणाले.

मंत्री मोन्सेरात हे कोमुनिदाद अधिवेशनात प्रमुख पाहुणे म्हणून उपस्थित होते. उदघाटनांनंतर मोन्सेरात म्हणाले की, गोव्यात सुमारे २२३ कोमुनिदाद आहेत. त्यात उत्तर, मध्य आणि दक्षिण असे तीन विभाग आहेत. कोमुनिदाद संरचना ही कोमुनिदाद प्रणालीच्या सदस्याचे नियम आणि कर्तव्ये परिभाषित करते.

या संहितेमुळेच कोमुनिदाद प्रणाली सुरळीतपणे कार्यरत आहे. गोव्यातील कोमुनिदादींच्या जमिनींवर बेकायदेशीर बांधकामे आणि अतिक्रमणे आहेत. ही प्रकरणे एका वर्षात निकाली काढण्यात येतील.

कोमुनिदाद जमिनीवरील बेकायदेशीर अतिक्रमण शोधण्यासाठी क्षेत्र सर्वेक्षण अधिकारी पाठविण्यात आले आहेत. या अधिवेशनात कोमुनिदाद सदस्यांनी मांडलेल्या सूचना आणि हरकतींचे सरकार स्वागत करेल, असेही मोन्सेरात म्हणाले.

कोमुनिदाद अधिवेशनाचे समन्वय ॲड. सावियो कुरैया कार्यक्रमानंतर ‘गोमन्तक’शी संवाद साधताना म्हणाले की, आजचा प्रकार हा धक्कादायक होता. कोमुनिदाद संरचनेत अगोदर जरी महिलांचा समावेश नसला, तरीही २१ व्या शतकात जिथे महिला सर्व क्षेत्रात नाव करत आहेत, त्या महिलांना कोमुनिदाद संरचनेत स्थान देण्यासाठी हवे ते बदल करता येतील.