Goa Crime: नाईट पार्टीत नशेचे औषध देऊन तरुणीवर लैंगिक अत्याचार, प.बंगालच्या दोघांना अटक; न्यायालयाने जामीन फेटाळला

पणजी: रेस्टॉरंटमध्ये रात्रीच्यावेळी पार्टी सुरू असताना एका तरुणीला नशा येणारे पेयजल देऊन तिला मागील बाजूस नेऊन बलात्कार केलेल्या दोघा संशयितांना सत्र न्यायालयाने जामीन फेटाळला. संशयित रिकेश थापा व मुस्कान प्रधान यानी केलेले गुन्हा गंभीर व घृणास्पद असल्याचे निरीक्षण जलदगती न्यायालयाने आदेशात नोंदवले आहे.

एका रेस्टॉरंटमध्ये १९ डिसेंबर २०२१ रोजी मैत्रिणींची पार्टी रात्री उशिरापर्यंत सुरू होती. त्यामध्ये ती सुद्धा सामील होती. संशयित हे रेस्टॉरंटमध्ये कामाला होते. मध्यरात्रीच्या सुमारास ती वगळता इतर मैत्रिणी या बाथरूमला गेल्या होत्या. तेव्हा संशयितांनी तिला पेयजलमध्ये गुंगीचा पदार्थ घातला व त्यानंतर रेस्टॉरंट्सच्या मागील बाजूला नेले.

दोघेही संशयित नेपाळी भाषेत बोलत होते. त्या दोघांनी बलात्कार केला तसेच लैंगिक शोषण केले. याप्रकरणी तिने महिला पोलिस स्थानकात तक्रार दाखल केली होती. या प्रकरणाचा तपास करून न्यायालयात त्या दोघांविरुद्ध आरोपपत्र सादर करण्यात आले होते. या खटल्यावरील सुनावणी सुरू आहे.

संशयित अटकेपासून ३ वर्षे ८ महिने कोठडीत आहेत. आरोपपत्र दाखल झाल्याने त्यांच्या अटकेची गरज नाही. ते मूळचे पश्‍चिम बंगालमधील असून गेली ७ वर्षे ते गोव्यात काम करत आहेत. त्यामुळे ते फरार होण्याची शक्यता नाही. न्यायालयाने घातलेल्या अटींचे पालन केले जाईल अशी बाजू संशयिताच्या वकिलांनी मांडली.

सरकारी वकिलांनी जामिनाला विरोध केला. पीडित तरुणी व साक्षीदारांची साक्ष न्यायालयात अजून व्हायची आहे. त्यांची सुटका केल्यास ते मुख्य साक्षीदारांना धमकावण्याची शक्यता आहे. पश्‍चिम बंगालचे असल्याने ते फरारी होण्याची शक्यता नाकारता येत नाही. त्यामुळे त्याना जामीन दिला जाऊ नये, अशी बाजू सरकारी वकिलांनी मांडली.

अमानुष गुन्हा!

प्रथमदर्शनी संशयिताविरुद्ध सादर केलेल्या पुराव्यातून ते गुन्ह्यात सामील असल्याचे दिसून येत आहे. त्यांनी केलेला गुन्हा अमानुष आहे. पीडित तरुणीची जबानी अजून न्यायालयात नोंद व्हायची आहे. साक्षीदारांचीही जबानी नोंद झालेली नाही. संशयितांनी जामिनासाठी घेतलेले मुद्दे जामिनावर सुटका करण्यासाठी अपुरे आहेत.

ते साक्षीदारांना व पीडितेला धमकावण्याची तसेच फरारी होण्याची शक्यता नाकारता येत नाही, असे निरीक्षण न्यायालयाने दोन्ही बाजू ऐकून घेतल्यानंतर केले आहे. संशयितांना त्यांच्या नातेवाईकांकडे बोलण्यास द्यावे, असे निर्देश तपास अधिकाऱ्याला दिले आहेत.