तिळारीतील निवासी गाळे बनलेत भूत बंगले, तळीरामांची चंगळ

धारगळ पंचायत क्षेत्रातील दोन खांब परिसरात जलसिंचन खात्याचे तिळारी प्रकल्पातील निवासी गाळे सध्या भूत बंगले बनले असून करोडो रुपये खर्च केलेले हे गाळे वापराविना पडून आहेत.

सरकारने दोन खांब येथे हजारो चौरस मीटर जागा संपादित करून त्या ठिकाणी तिळारी जलसिंचन खात्यातर्फे निवासी गाळे उभारले होते. त्यातील काही गाळ्यांचा वापर केला जातो, तर काही गाळे वापराविना पडून आहेत. दुर्लक्ष झाल्यामुळे ते दुरुस्तीच्या प्रतीक्षेत आहेत. रात्रीच्या वेळी काही मद्यपी त्यांचा गैरवापर करतात, असे आढळून आले आहे. (Tilari Project residential blocks)

मोपा विमानतळ ते धारगळ-सुकेकुळणपर्यंत लिंक रोड होत असल्यामुळे धारगळ पंचायत क्षेत्राला भविष्यात मोठा लाभ होऊ शकतो.

त्या दृष्टीकोनातून धारगळ पंचायतीने पुढाकार घेऊन तिळारी प्रकल्पाचे गाळे वापराविना पडून आहेत, त्यातील काही जागा ताब्यात घेऊन त्या ठिकाणी बहुउद्देशीय प्रकल्प उभारावा, अशी मागणी केली जात आहे.