Colva Beach Goa: कोलवा बीचवर बुडणाऱ्या 3 पर्यटक तरूणांचा वाचवला जीव; 'दृष्टी'च्या जीवरक्षकांची कामगिरी

Colva Beach Goa: गोव्यातील कोलवा समुद्र किनाऱ्यावर पाण्यात पोहण्यासाठी उतरले असताना बुडू लागलेल्या दिल्लीच्या तीन पर्यटकांचा आज, मंगळवारी दृष्टीच्या जीव रक्षकांनी जीव वाचविला. या तिन्ही तरूणांची प्रकृती आता चांगली आहे.

हे तिन्ही पर्यटक विशितले आहेत. पाण्याचा अंदाज न आल्याने ते बीचवर दंगामस्ती करत खोल पाण्यात गेले. खोल पाण्यात त्यांना पोहण्याच अडचण जाणवू लागली. त्यामुळे ते गटांगळ्या खाऊ लागले.

हे लक्षात येताच समुद्र किनाऱ्यावर असलेल्या दृष्टी मरीन या संस्थेच्या मनिष आणि वैभव या दोन जीवरक्षकांनी तत्काळ या पर्यटकांच्या दिशेने धाव घेतली. जीवरक्षकांनी रेस्क्यू ट्युब आणि सर्फ बोर्डच्या सहाय्याने बुडणाऱ्या तरूणांना पाण्याबाहेर काढून किनाऱ्यावर आणले.

दरम्यान, या किनाऱ्यावर आई-वडिलांपासून वेगळे होऊन भरकटलेल्या लहान मुलालाही दृष्टीच्या जीवरक्षकांनी शोधून पुन्हा संबंधित पालकांकडे दिले.