सासष्टी, गोव्यात ज्या औद्योगिक कंपन्या आहेत, त्या रोजगारासाठीच्या मुलाखती गोमंतकीय युवकांना डावलून इतर राज्यांमध्ये घेतात.
आम्ही इंडोको कंपनीची मुलाखत प्रक्रिया बंद पाडल्यानंतर आता मडकईस्थित ‘इनक्युब इथिकल्स’ कंपनीने नोकर भरतीसाठी मुलाखतीचा कार्यक्रम पुण्यात निश्र्चित केला आहे, अशी माहिती गोवा फॉरवर्डचे अध्यक्ष तथा आमदार विजय सरदेसाई यांनी आज पत्रकार परिषदेत दिली. मात्र, सरदेसाईंच्या आक्रमकतेनंतर ‘इनक्युब इथिकल्स’ कंपनीने मुलाखतीचा कार्यक्रम रद्द केला.
सरदेसाई म्हणाले की, राज्य सरकारकडे गोमंतकीय युवकांना खासगी कंपन्या किंवा सरकारी खात्यांमध्ये रोजगार देण्यासाठी योग्य धोरणच नाही. सर्वच युवकांना सरकारी नोकरी देणे शक्य नसले, तरी खासगी औद्योगिक कंपन्यांमध्ये रोजगार देण्याचे धोरण आखावे आणि विधानसभेत रोजगाराबाबत श्वेतपत्रिका सादर करावी.
परराज्यांतील युवक गोव्यात नोकरीसाठी येऊन स्थायिक होऊ लागले तर राज्याच्या लोकसंख्येवर परिणाम होणार असून भविष्यात ते त्रासदायक ठरण्याची शक्यता आहे. गोव्यात बेरोजगारीची टक्केवारी वाढत आहे.
यात सरकारचा हात तर नाही ना?
ज्या फार्मा कंपन्यांनी पदे जाहीर केली आहेत, त्या सर्व पदांसाठीचे योग्य उमेदवार गोव्यात असूनही इतर राज्यांत मुलाखती घेण्याचे प्रयोजन काय? या कंपन्यांना इतर राज्यांतील कर्मचारी आणण्याचे धाडस तरी कसे होते. यात सरकार पक्षाचा हात नसेल ना, अशी शंकाही सरदेसाई यांनी व्यक्त केली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.