नगरनियोजन खात्यात जुन्या तारखेने भरती; गोवा फॉरवर्डचा सरकारवर आरोप

मडगाव: आचारसंहिता लागू झाल्यानंतरही गोवा सरकारच्या नगरनियोजन खात्यात आपल्या मर्जीतील उमेदवारांना मागच्या तारखेने नोकरभरतीची ऑफर लेटर्स दिली जात असल्याचा आरोप गोवा फॉरवर्डने (Goa Forward Party) केला असून या खात्याचे आऊटवर्ड रजिस्टर निवडणूक आयोगाने जप्त करावे अशी मागणी केली आहे.

गोवा फॉरवर्डचे सरचिटणीस दुर्गादास कामत यांनी निवडणूक आयोगाकडे (Election Commission) केलेल्या तक्रारीनुसार जुन्या तारखेने आऊटवर्ड नंबर टाकून ही ऑफर लेटर्स दिली जातात अशी आपल्याला खात्रीपूर्वक सूत्रांकडून माहिती प्राप्त झाल्याचे म्हटले आहे.

नगर नियोजन खाते उपमुख्यमंत्री बाबू कवळेकर यांच्याकडे असून आचारसंहिता लागू झाल्या नंतरही त्यांच्या खात्यातील कर्मचारी मागच्या तारखेने आऊटवर्ड क्रमांक टाकून हे काम करत असल्याचा आरोप कामत यांनी केला असून त्याचे पुरावेही आपल्याकडे असल्याचे त्यांनी म्हटले आहे.

कवळेकरांच्या कृषी खात्यातही असाच प्रकार चालू असल्याचा आरोप काँग्रेस (Congress) पक्षाने केला आहे. हा गोलमाल करत असताना व्हिडीओ शूट करण्यात आला असून काँग्रेस लवकरच याचा भांडाफोड करेल अशी माहिती काँग्रेसच्या काही सूत्रांनी दिली.