Goa Recruitment: नोकरभरतीची जाहिरात आली 2019 मध्ये; परीक्षेसाठी उजाडले 2023

Goa Recruitment: गोव्यात 2019 मध्ये 147 पदांसाठी नोकरभरतीची जाहिरात प्रसिद्ध झाली होती. तथापि, विविध कारणांमुळे ही नोकरभरती रखडली होती. मात्र, आता 2023 मध्ये म्हणजे सुमारे चार वर्षांनी या पदांसाठी परीक्षा होणार आहे.

लोवर डिव्हिजन क्लर्क (एलडीसी), ज्युनियर स्टेनोग्राफर, तलाठी, एमटीएस (मल्टीटास्किंग) या पदांसाठीची ही जाहिरात होती. त्यावेळी राज्यातील अनेक उमेदवारांनी त्यासाठी अर्ज केले होते.

या उमेदवारांमधूनही ही परीक्षा कधी होणार, याबाबत गेल्या चार वर्षामध्ये या उमेदवारांमधूनही वारंवार विचारणा होत होती. अखेर आता या पदांसाठी या महिन्यात परीक्षा होणार आहे. दक्षिण गोवा जिल्हाधिकारी कार्यालयात एप्रिलमध्ये ही परीक्षा होणार आहे, असे कळते.

गोव्यातील बेरोजगारीचा प्रश्न मोठा आहे. गेल्या काही काळामध्ये गोव्यातील बेरोजगारीचा प्रश्न सातत्याने चर्चेत आला होता. बेरोजगारीच्या सरासरीपेक्षा गोव्यातील बेरोजगारीची सरासरी जास्त आहे. विरोधी पक्षातील नेत्यांनीही यावरून राज्यात रान उठवले होते.