Amit Shah Goa Rally: अमित शाह यांच्या सभेच्या ठिकाणी 'नो फ्लाय झोन' घोषित

Amit Shah Goa Rally: केंद्रीय गृहमंत्री अमित शाह यांची गोव्यात रविवारी, 16 एप्रिल रोजी सभा होत आहे. या सभेद्वारे अमित शाह गोव्यातील लोकसभा निवडणुकीच्या प्रचाराचा बिगुल फुंकणार, अशी चर्चा सुरू आहे. फोंडा तालुक्यातील फार्मागुडी येथे ही सभा होणार आहे.

दरम्यान, या सभेच्या ठिकाणी नो फ्लाय झोन घोषित करण्यात आला आहे. तशा प्रकारचे आदेश दक्षिण गोव्याच्या जिल्हाधिकाऱ्यांनी दिले आहेत.

फार्मागुडी येथील मैदानावर दुपारनंतर अमित शाह यांची सभा होणार आहे. या मैदानावरील ५ किलोमीटर क्षेत्रात नो फ्लायिंग झोनची घोषणा करण्यात आली आहे. दुपारी ३ ते रात्री ९ वाजेपर्यंत नो फ्लायिंग झोन लागू असेल. या काळात ड्रोन उड्डाणास देखील बंदी असणार आहे.

पुढील वर्षी देशात लोकसभा निवडणूक होईल. त्यासाठीची तयारी भाजपने सुरू केली आहे. त्यामुळेच भाजपसाठी अवघड ठरणाऱ्या शंभरहून अधिक लोकसभा मतदारसंघामध्ये केंद्रीय मंत्री वारंवार दौरा करत आहे. या मतदारसंघांची जबाबदारीच मंत्र्यांमध्ये वाटून दिली गेली आहे.

गोव्यात लोकसभेचे दोन मतदारसंघ आहेत. पैकी उत्तर गोवा मतदारसंघातून गत लोकसभा निवडणुकीत भाजपचे श्रीपाद नाईक विजयी झाले होते. ते सध्या केंद्रीय राज्यमंत्रीही आहेत. तथापि, दक्षिण गोव्यात मात्र भाजपला पराभवाला सामोरे जावे लागले होते. दक्षिण गोव्यातून काँग्रेसच्या फ्रान्सिस सार्दिन यांनी बाजी मारली होती.

विशेष म्हणजे, २०१४ च्या लोकसभा निवडणुकीत दक्षिण गोव्यात भाजपचा उमेदवार जिंकला होता. तरीही २०१९ मध्ये येथून भाजपचा उमेदवार पराभूत झाला होता. आता अमित शाह यांच्या या सभेचे आयोजन करून भाजपने पुन्हा ही जागा परत जिंकायची चंग बांधल्याचे दिसून येत आहे.