अंगणवाडी सेविकांना सेवेत रुजू करा; काँग्रेसची मागणी

पणजी: पणजीतील आझाद मैदान येथे आंदोलनाला बसलेल्या अंगणवाडी सेविकांना पुन्हा सेवेत रुजू केले पाहिजे. गेल्या 31 दिवसांपासून त्यांचे धरणे आंदोलन सुरू असून गेले दहा दिवस हे आमरण उपोषण त्या करत आहेत. त्यातील पौर्णिमा गावकर या अंगणवाडी सेविकेची प्रकृती खालावल्याने तिला गोमेकॉत दाखल करण्यात आले आहे.

(Recruit Anganwadi workers goa Congress demand)

अंगणवाडी सेविका या महिला आणि बाल कल्याण खात्याअंतर्गत येतात, परंतु संबंधित मंत्र्यांना काही पडून गेलेले नाही. त्‍यासाठी मुख्यमंत्र्यांनी त्वरित हस्तक्षेप करून त्यांना पुन्हा सेवेत रुजू करण्याची आवश्‍यकता आहे, अशी मागणी काँग्रेस प्रदेशाध्यक्ष अमित पाटकर यांनी केली.

बांबोळी येथे गोमेकॉ संकुलात ते पत्रकारांशी बोलत होते. यावेळी सोबत सांताक्रूझचे आमदार रुडाल्फ फर्नांडिस व इतर काँग्रेस पदाधिकारी उपस्थित होते.

अंगणवाडी सेविकांना पूर्व सूचना न देताच कामावरून काढून टाकले होते. पुन्हा सेवेत रुजू करण्याची मागणी घेऊन धरणे आंदोलन सुरू केले आहे.

महिला आणि बाल विकास खात्याचे मंत्री असंवेदनशील असल्याचे यावरून सिद्ध होते. त्यासाठी या प्रकरणात मुख्यमंत्र्यांनी हस्तक्षेप करावा. एवढ्या दिवसांपासून त्यांचे आंदोलन सुरू आहे. आता त्‍यांची मागणी पूर्ण केली पाहिजे, असे पाटकर म्हणाले.

आंदोलन करत असलेल्‍या अंगणवाडी सेविका पौर्णिमा गावकर यांची आज प्रकृती खालावली. गोमेकॉत दाखल करण्यात थोडासा विलंब झाला असता, तर काहीही झाले असते. त्यासाठी आता सरकारने त्यांची मागणी पूर्ण केली पाहिजे. त्यांना आणखी आंदोलन करण्यासाठी सरकारने भाग पाडू नये, असे मत सांताक्रूझचे आमदार रुडाल्‍फ फर्नांडिस यांनी व्यक्त केले.