शिरगाव पंचायतीच्या सरपंचपदी भगवंत गावकरांची फेरनिवड

डिचोली: शिरगाव पंचायतीच्या (Shirgaon Panchayat) सरपंचपदाची माळ अखेर अपेक्षेप्रमाणे भगवंत भास्कर गावकर (Bhagwant Bhaskar Gavkar) यांच्या गळ्यात पडली आहे. सोमवारी झालेल्या निवडणुकीत त्यांची सरपंचपदी बिनविरोध निवड झाली. शिरगाव पंचायतीच्या रिक्त सरपंच पदाची निवड करण्यासाठी आज सकाळी पंचायत मंडळाची बैठक घेण्यात आली. बैठकीस पाचपैकी उपसरपंच सौ. विजया मांद्रेकर यांच्यासह भगवंत गावकर, सदानंद गावकर आणि कल्पिता जी. घाडी हे चार पंचसदस्य उपस्थित होते. तर पदच्युत सरपंच अच्युत गावकर अनुपस्थित होते.

सरपंच पदासाठी भगवंत गावकर यांनी एकट्यानेच अर्ज भरला. या अर्जावर सूचक आणि अनुमोदक म्हणून अनुक्रमे सदानंद गावकर आणि विजया मांद्रेकर यांनी सही केली होती. निर्वाचन अधिकारी म्हणून उपस्थित असलेले डिचोली गट विकास अधिकारी कार्यालयातील अधिकारी प्रतापराव राणे यांनी हा अर्ज ग्राह्य धरून भगवंत गावकर यांची सरपंचपदी बिनविरोध निवड झाल्याचे जाहीर केले. निवडणूक प्रक्रिया यशस्वी करण्यासाठी पंचायत सचिव स्वप्नज पेडणेकर यांनी सहकार्य केले.