Goa Shigmotsav 2023: स्पर्धकांनो, वेळेचे काटेकोर पालन करा : रवी नाईक

फोंड्यातील शिगमोत्सवात यंदा वेळेचे काटेकोरपणे पालन करण्याबाबत एकमत झाले. कोविड महामारीनंतर प्रथमच राज्यस्तरीय शिगमोत्सवाला यंदा सुरवात होत असल्याने यावर्षीचा शिगमोत्सव मोठ्या उत्साहात साजरा करण्याबाबत (रविवारी) फोंड्यातील राजीव गांधी कलामंदिरात झालेल्या बैठकीत चर्चा झाली.

यावेळी फोंड्याचे आमदार तथा राज्याचे कृषीमंत्री रवी नाईक तसेच अंत्रुज शिगगोत्सव समितीचे अशोक नाईक, गुरुनाथ नाईक, किशोर नाईक व नगरसेवक आनंद नाईक उपस्थित होते.

फोंडा तालुका अंत्रुज शिगमोत्सव समितीतर्फे गेली अनेक वर्षे फोंड्यात शिमगोत्सव साजरा केला जातो. राज्यस्तरीय सरकारी पातळीवरील शिगमोत्सव यंदा फोंड्यात येत्या 8 मार्च रोजी होणार असून यावेळी चित्ररथ, रोमटामेळ तसेच लोककला स्पर्धेचे आयोजन करण्यात आले आहे.

याशिवाय दोन स्तरावर वेशभूषा स्पर्धाही घेण्यात येणार असून स्पर्धकांनी उत्स्फूर्त प्रतिसाद द्यावा असे आवाहन समितीतर्फे करण्यात आले आहे. या शिगमोत्सवात येत्या 1 मार्च रोजी संध्याकाळी 5 वा. तिस्क-फोंडा येथे शिगमोत्सव कार्यालयाचे उद्घाटन होणार आहे.

या कार्यक्रमाला कृषीमंत्री रवी नाईक तसेच कला संस्कृतीमंत्री गोविंद गावडे, फोंडा नगराध्यक्ष रितेश नाईक, उपनगराध्यक्ष अर्चना डांगी तसेच इतर नगरसेवक व मान्यवर मंडळी उपस्थित राहणार आहेत.

"शिगमोत्सव हा गोमंतकीय परंपरेचे दर्शन असून लोककला आणि लोकसंस्कृतीचे रक्षण करणाऱ्या या उत्सवामुळे सरकारी शिगमोत्सवात सर्वधर्मीय लोक सहभागी होतात. त्यामुळे शिगमोत्सव हे एकतेचे प्रतीक असून यंदाच्या शिगमोत्सवात शिगमोप्रेमी तसेच स्पर्धक पथकांनी वेळेत उपस्थित रहावे आणि स्पर्धा यशस्वी करण्यासाठी सहकार्य करावे."

- रवी नाईक (कृषीमंत्री)

फेटे बांधण्याची कार्यशाळा

3 मार्च रोजी फेटे बांधण्याची कार्यशाळा होणार असून 4 रोजी संध्याकाळी 6 वाजता शिगमोत्सव आयोजनातील इतर बाबींवर चर्चा करण्यासाठी समितीची बैठक होणार आहे. या बैठकीला सदस्यांची उपस्थिती असेल.

5 रोजी दुपारी 2.30 वाजता म्हार्दोळ येथे महालसेला नमन घालण्यात येणार असून 8 रोजी शिगमोत्सव मिरवणूक होईल. ही मिरवणूक संध्याकाळी ठीक 4 वाजता तिस्क - फोंडा येथून सुरू करण्यात येणार आहे. न्यायालयीन ध्वनीप्रदूषणाच्या आदेशानुसार रात्री दहापर्यंतच मिरवणूक निघेल. त्यामुळे स्पर्धकांनी वेळेत उपस्थित रहावे.