Digambar Kamat Ramesh Tawadkar Oath: दिगंबर कामतांना देव पावला, रमेश तवडकरांसोबत घेतली मंत्रिपदाची शपथ; आता खाती कोणती मिळणार याची उत्सुकता

पणजी: अनेक दिवसांपासून रखडलेला गोवा मंत्रिमंडळाचा फेरबदल अखेर गुरुवारी (२१ ऑगस्ट) पार पडला. विधानसभेचे माजी सभापती रमेश तवडकर आणि माजी मुख्यमंत्री दिगंबर कामत यांनी दुपारी १२ वाजता राजभवन येथे मंत्रिपदाची शपथ घेतली. राज्यपाल पुसापती अशोक गजपती राजू यांनी त्यांना पद आणि गोपनीयतेची शपथ दिली.

रमेश तवडकरांनी गुरुवारी सकाळी सभापतीपदाचा राजीनामा दिला. तर, पर्यावरण खात्याचे मंत्री आलेक्स सिक्वेरा यांनी बुधवारी सायंकाळी मंत्रिपदाचा राजीनामा दिला होता. गोविंद गावडे आणि आलेक्स सिक्वेरा या दोन रिक्त मंत्रिपदावर रमेश तवडकर आणि दिगंबर कामत यांची वर्णी लागल्याचे निश्चित झाले होते. त्यानंतर गुरुवारी दुपारी राजभवनात त्यांचा शपथविधी पार पडला. तवडकर आणि कामत यांना कोणत्या खात्याची जबाबदारी देणार हे मात्र अद्याप निश्चित झालेले नाही.

"मी विधानसभा अध्यक्ष म्हणून माझ्या कामावर समाधानी होतो आणि पूर्ण कार्यकाळ काम करण्याची माझी इच्छा होती. मात्र, पक्षश्रेष्ठींनी घेतलेल्या निर्णयाचा आदर करत त्यांनी मंत्रिपद स्वीकारले," अशी प्रतिक्रिया रमेश तवडकरांनी शपथविधीनंतर माध्यमांशी बोलताना दिली.

“१३ वर्षानंतर मला पुन्हा मंत्री होण्याची संधी मिळाली आहे. यासाठी पंतप्रधान नरेंद्र मोदी, मुख्यमंत्री सावंत, जे. पी. नड्डा, बी. एल. संतोष आणि प्रदेशाध्यक्ष दामू नाईक यांचे आभार मानतो. मंत्री म्हणून मला लोकांसाठी आणि पक्ष मजबूत करण्यासाठी काम करता येईल,” असे दिगंबर कामत म्हणाले.

मागची ३० वर्षे गोव्‍यातील राजकीय क्षेत्रात दिगंबर कामत आमदार म्‍हणून कार्यरत आहेत. ते पाच वर्षे पूर्ण मुख्यमंत्री म्हणून कार्यकाळ पूर्ण करणारे मुख्यमंत्री ठरले होते. २००७ ते २०१२ या काळात राज्याच्या मुख्यमंत्री पदाची धुरा त्यांच्याकडे होती.

तर, २००५ साली पहिल्यांदा पैंगीण पोटनिवडणुकीतून आमदार झालेले तवडकर २०१२ ते २०१७ मनोहर पर्रीकरांच्या सरकारमध्ये कृषी, पशुसंवर्धन, क्रीडा व आदिवासी कल्याण खात्याचे मंत्री होते. त्यानंतर २०२२ मध्ये त्यांच्याकडे विधानसभेच्या सभापतीपदाची जबाबदारी देण्यात आली होती.

नव्याने शपथ घेतलेल्या दिगंबर कामत यांच्यावर विरोधकांनी टीका केली आहे. 'ओल्ड वाईन इन न्यू बॉटल', अशा शब्दात गोवा फॉरवर्डचे आमदार विजय सरदेसाई यांनी या शपथविधीवर टीका केली. '२००७ ते २०१२ या काळात भाजपने टीका केलेल्या काँग्रेस सरकारमधील सात मंत्री आताच्या भाजप सरकारमध्ये असून, काहीच नवीन नाही. याचा अर्थ भाजप सरकारच्या १२ मंत्र्यांमध्ये दिगंबर कामतांची मेजॉरिटी आहे,' असे विजय सरदेसाई म्हणाले.