Bhutani Infra: ..तर 'वायनाड'ची पुनरावृत्ती व्हायला वेळ लागणार नाही! सांकवाळ येथे रॅलीतून 'भूतानी' विरोधात इशारा

Protest Against Bhutani Infra Project Sancoale

वास्को: भूतानी प्रकल्पाच्या विरोधात सांकवाळ येथे काढलेल्या या रॅलीत कुठ्ठाळीचे आमदार आंतोन वाझ, माजी मंत्री एलिना साल्ढाणा, ॲड. प्रतिमा कुतिन्हो, दक्षिण गोवा भाजप अध्यक्ष तुळशीदास नाईक, आरटीआय कार्यकर्ते नारायण नाईक यांच्यासह इतरांनी भाग घेतला. पर्यावरणाचा ऱ्हास केल्यास राज्यात वायनाडसारख्या नैसर्गिक आपत्तीची पुनरावृत्ती व्हायला वेळ लागणार नाही, असा गर्भित इशारा रॅलीत सहभागी झालेल्या मान्यवरांनी दिला.

सरकारने राज्यातील जनतेला गृहीत धरू नये. जनतेने ठरविल्यास राज्यात होत असलेल्या सर्व मेगा प्रकल्पांविरोधात आक्रोश वाढू शकतो. सरकारने जनतेच्या हितासाठी कार्य करणे आवश्यक आहे. सर्वसामान्य जनतेचा भाजप सरकारवरील विश्वास उडाला आहे, अशी प्रतिक्रिया यावेळी मान्यवरांनी व्यक्त केली. यावेळी मोठ्या प्रमाणात पोलिस बंदोबस्त तैनात करण्यात आला होता.

...अन्यथा आंदोलन

राज्यातील भाजपचे सरकार डोंगर, वनक्षेत्र, शेतजमीन दिल्लीतील भूमाफियांना विकत असल्याने आज सरकारविरोधात जनता रस्त्यावर उतरली आहे. सरकारने भूतानीचा हा प्रकल्प रद्द न केल्यास यापुढे आणखी मोठे आंदोलन छेडण्यात येईल, असा इशारा रॅलीमध्ये देण्यात आला.