दक्षिण गोव्यातील रस्ता अपघातांवर त्वरित तोडगा काढा

गोवा सरकार व राज्य प्रशासनाने नागरिकांच्या आरोग्य व सुरक्षेकडे अक्षम्य दुर्लक्ष केल्याचा आरोप गोवा प्रदेश युवा काँग्रेस समितीने केला आहे. राज्यात रस्ता अपघातांमुळे जीव गमावणाऱ्यांची संख्या दिवसेंदिवस वाढत चालली आहे, याकडे लक्ष वेधताना दक्षिण गोवा जिल्हा अध्यक्ष महेश नाडर यांनी वाहतूक सुरळीत व सुरक्षितपणे चालण्यासाठी पुरेशा उपाययोजना करण्यास सरकार अपयशी ठरल्याचे म्हटले आहे.

जिल्हा प्रशासनाला दिलेल्या निवेदनात नाडर यांनी सुरक्षेसंबंधीच्या त्रुटी दाखवून देताना यावर तोडगा काढून भविष्यातील दुर्घटना टाळण्याचे आवाहन केले आहे. नाडर यांनी अधिकाऱ्यांना सांगितले की, केवळ सामन्य नागरिकांनाच नव्हे तर गोवा पोलिसांनादेखील राज्य प्रशासनाच्या रस्ता सुरक्षेसंबंधीच्या संथ कारभाराचा फटका बसत चालला आहे.

क्रॅश बॅरियर्स, योग्य दिशादर्शक फलक, योग्य रस्ता आखणी व धोकादायक क्रॉसिंग बंद करण्याची प्रक्रिया करण्यात आलेली नाही. राजकीय दबावापोटी मुख्य हमरस्त्यांना जोडणारे अनेक लहान-मोठे रस्ते खुले करण्यात आल्याचे यावेळी नाडर यांनी दाखवून दिले. या वाढत्या अडथळ्यांमुळे वाहनचालक व पादचाऱ्ंयांनादेखील जीव मुठीत धरावा लागत आहे.

तसेच मडगावच्या आसपासच्या परिसरात काही धोकादायक क्षेत्रे आहेत. यावर तातडीने लक्ष देण्याची गरज आहे. पॉवर हाऊस ते आर्लेम रस्ता हा वाहतुकीस धोकादायक बनत चालला आहे, बोर्डा सेंट ज्योकिम चॅपेल रस्त्यावर अतिरिक्त गतिरोधकांची गरज आहे.

जवळपासच्या भागातील इस्पितळांची संख्या पाहता हे तातडीने होणे गरजेचे आहे. चौगुले कॉलेजकडे जाणारा रस्ता पूर्णपणे खोदण्यात आला आहे. येथे बॅरिकेट््स, धोक्याची सूचना देणारे फलक उभारलेले नाहीत. आवश्यक ठिकाणी गतिरोधक तसेच बॅरिकेट््स रात्रीच्या वेळी दृष्टिस पडण्यासाठी चमकणारा रंग त्यावर मारण्याची गरज असल्याची मागणी युवा काँग्रेसने केली आहे.

कधीही न संपणाऱ्या रस्ता खोदाई तसेच मलनिस्सारणाच्या कामामुळे राज्यातील रस्ते वाहन चालवण्यायोग्य राहिलेले नाहीत. मडगाव बसस्थानकासमोरील रस्ता हे त्याचे उत्तम उदाहरण आहे. हा रस्ता केवळ धोकादायकच नसून कायम वाहतूक कोंडी करणारा आहे. हा संपूर्ण पट्टा अपघातास निमंत्रण देणारा आहे.

कित्येकवेळा रस्त्यांचे खोदकाम केल्याने बसेसना आत शिरण्याासाठी व बाहेर पडण्यासाठी खूप कमी जागा मिळते. यात अन्य वाहने, स्थिरावलेली वाहने, विक्रेते, हातगाडीवाले असल्याने वाहतुकीस धोकादायक आहे.

- महेश नाडर, दक्षिण गोवा जिल्हा अध्यक्ष