Accident in Goa : ...तोपर्यंत मृतदेह ताब्यात घेणार नाही; सांगेत स्थानिकांचा रास्तारोको

Accident in Goa : दाबामळ कोठार्ली येथे ट्रकखाली आल्याने युवकाचा काल बुधवारी 19 ऑक्टोबर रोजी जागीच मृत्यू झाला होता. लवलेश मनोहर च्यारी असं या 25 वर्षीय तरुणाचं नाव आहे. या अपघाती मृत्यूनंतर आक्रमक झालेल्या जमावाने आज सकाळपासूनच सांगेत रास्तारोको केला. तसंच मंत्र्यांचा ताफाही रोखला. या रास्तारोकोमुळे काहीकाळ परिसरात तणाव पाहायला मिळाला.

दरम्यान स्थानिकांनी अपघातास कारणीभूत असलेल्या पेप्सी कंपनीच्या अधिकाऱ्यांनी येईन आमच्या सुरक्षिततेची हमी द्यावी अशी मागणी केली. तसंच जोपर्यंत हमी मिळत नाही तोपर्यंत लवलेश या तरुणाचा मृतदेहही ताब्यान न घेण्याचा पवित्रा स्थानिकांनी घेतला. गुरुवारी सकाळपासूनच रास्तारोको केल्यामुळे मात्र अनेक प्रवाशांची चांगलीच गोची झाली.

याच मार्गाने जाणाऱ्या मंत्री सुभाष शिरोडकर यांनाही स्थानिकांनी रोखलं. तसंच सुभाष फळदेसाई यांनीही घटनास्थळी दाखल होत लवकरात लवकर वाहतुकीच्या समस्येवर तोडगा काढून अपघात रोखण्यासाठी उपाययोजना करण्याची हमी स्थानिकांना दिली.

लवलेश च्यारी नावाचा तरुण बुधवारी दुपारच्या सुमारास दुचाकीने (GA09 C1628) घरी जात होता. दाबामळ कोठार्ली येथील मुख्य रस्त्यावर असलेल्या वळणावर अवजड ट्रक पेप्सी कंपनीच्या दिशेने जात होता. यावेळी वळणावर अचानक समोरून येणाऱ्या ट्रकला पाहून लवलेश गडबडला. त्याचे दुचाकीवरून नियंत्रण सुटून गाडीसह ट्रकखाली आला.

या अपघातात त्याचा जागीच मृत्यू झाला. घटनेनंतर वाहनचालक घटनास्थळावरून फरार झाला. सांगे पोलिस त्यांचा शोध घेत आहेत. दोनच दिवसांपूर्वी लवलेशने आपला 25 वा वाढदिवस साजरा केला होता. दरम्यान, वळणावर असलेली झाडीझुडपे वेळीच कापली असती तर हा अपघात घडला नसता, असे स्थानिकांचे म्हणणे आहे. युवकांनी अनेकदा शेळपे औद्योगिक वसाहतीत जाणाऱ्या वाहनांना गतीला आवर घालण्यासाठी आणि रस्त्याची साफसफाई करण्यासाठी सूचना केली होती. पण कंपनी सामाजिक कार्याला असहकार्य होत असल्याचा आरोप ग्रामस्थांनी केला.