भजन कलेतून धर्म, संस्कृतीचे रक्षण: मायकल लोबो

कळंगुट: गावोगावी सादर करण्यात येत असलेल्या भजनी कलेमुळे धर्म तसेच संस्कृतीचे रक्षण होते. त्यामुळे या कलेचे संवर्धन व्हायला हवे, तसेच ही कला भावी पिढीला समजण्यासाठी, या कलेच ते पारंगत होणे गरजेचे आहे, असे मत कळंगुटचे आमदार मायकल लोबो यांनी हडफडे येथे व्यक्त केले.

दिवानभाटी-हडफडे येथील केडीआर बॉयज ऑफ आरपोरा येथे श्रीआरवेश्वर देवस्थानच्या प्रांगणात वासुदेव रेडकर यांच्या स्मरणार्थ आयोजित अखिल गोवा भजनी स्पर्धेचे आयोजन करण्यात आले होते. यावेळी प्रमुख पाहुणे म्हणून लोबो उपस्थित होते. व्यासपीठावर आमदार दिलायला लोबो, सेबेस्तियांव पिंटो, साब्रीना पिंटो, हडफडेंचे माजी सरपंच आगुस्तिनो डिसौझा, केडीआर बॉयजचे अध्यक्ष जयदीप गाड, हडफडे पंचायतीच्या उपसरपंच व्हायलेटा डिसोझा, पंच सदस्य राजेश मोरजकर, स्पर्धेचे परिक्षक राया कोरगांवकर, सुमेधा देसाई आदी मान्यवर उपस्थित होते.

दिलायला लोबो म्हणाल्या, हडफडे गावात अखिल गोवा मर्यादित भजनी स्पर्धा तीन वर्षापासून आयोजन करणाऱ्या केडीआर बॉयजचे कौतुक आहे. यापुढेही अशाच स्पर्धा त्यांनी आयोजित कराव्या. पंचक्रोशीतील जेष्ठ भजनी कलाकार दयानंद वि. दिवकर, तुकाराम मधुकर दीवकर, संजीत नारायण हरमलकर, सदानंद शांताराम पेडणेकर, तसेच शाबी विष्णू मांद्रेकर (मरणोत्तर) यांचा आमदारांच्या हस्ते गौरव करण्यात आला.भजन स्पर्धेचे सूत्रसंचालन संतोष मुरुडकर, रोशन रेडकर केले.