'बड्डेतील स्थानिकांचे प्रश्न तातडीने सोडवणार'

आगोंद: खोतीगाव पंचायत क्षेत्रातील बड्डे व महाल बड्डे या प्रभागातील अनंत अडचणी आपण गेल्या 3 महिन्यांपूर्वी निवडणूक प्रचारावेळी अनुभवल्या असून मुळात ही जमीन महसूल व वन खात्याची आहे. सर्व समस्या ऐकून या प्रभागाचा विकास करण्याकरता उपाययोजना करून स्थानिकांचे प्रश्‍न तातडीने सोडवणार असल्याचे सभापती रमेश तवडकर यांनी सांगितले. तसेच कामांना गती देण्याचे संबंधित अधिकाऱ्यांना आदेश दिले.

यावेळी त्यांच्यासह उपजिल्हाधिकारी मधु नार्वेकर, मामलेदार मनोज कोरगावकर, जलस्रोत खात्याचे लेस्टर फर्नांडिस, प्रदीप पागी वीज खात्याचे अनुप राणे, अन्य विभागांचे अभियंते तसेच महेश नाईक विशाल देसाई, दिवाकर पागी, आनंदु देसाई, दामोदर लवकर, राजेश गावकर, कृष्ण गावकर, रोहिदास गावकर, रजनीश गावकर व अन्य स्थानिक नागरिक, तसेच महिला मोठ्या संख्येने उपस्थित होत्या.

बड्डे येथील बैठकीत कृष्णा गावकर यांनी उपस्थितांचे स्वागत करून या गावात असलेल्या प्रमुख समस्या सभापती व अन्य अधिकाऱ्यांसमोर मांडल्या. महाल बड्डे येथील नागरिकांना सतावणाऱ्या प्रमुख प्रश्नांमध्ये पाण्याचा प्रश्न, महादेव मंदिराचे सुशोभीकरण, सांस्कृतिक सभागृह वाचनालय, गटार बांधकाम संरक्षक भिंत यांचा उल्लेख रजनीश गावकऱ्यांनी केला.