प्रमोद सावंतांचे सरकार म्हणजे फक्त दलाली, विजय सरदेसाईंचा घणाघात

मडगाव: प्रमोद सावंत (Pramod Sawant) यांचे गोव्यातील सरकार हे ब्रोकरांचे सरकार असून स्वतःच्या फायद्यासाठी या सरकारातील मंत्र्यांनी गोवा लिलावात काढला आहे, असा आरोप गोवा फॉरवर्डचे (Goa Forward) अध्यक्ष विजय सरदेसाई (Vijay Sardesai) यांनी आज केला. आज घोगळ येथील एका रस्त्याचे अडीज कोटी रुपये खर्चून डांबरीकरण करण्यात येणार असून या कामाचे उदघाटन करताना त्यांनी हा आरोप केला. या नोकरभरती घोटाळ्या संदर्भात उच्च न्यायालयात याचिका दाखल करण्या बरोबरच निवडणूक आयोगाकडे तक्रार करू असे त्यांनी सांगितले.

वास्तविक निवडणुकीच्या काळात जर कुठलेही सरकार नोकऱ्या देत असतील तर त्या आपल्या पक्षाच्या कार्यकर्त्याना देतो. मात्र या सरकारातील मंत्र्यांनी नोकऱ्या विकण्याचे दुकान थाटले आहे. आपल्या कार्यकर्त्याना नव्हे तर दुसऱ्या मतदारसंघातील उमेदवारांना ते नोकऱ्या विकतात असा आरोप केला. ज्या उमेदवाराकडून पैसे घेतले गेले आहेत त्यांच्या कोऱ्या प्रश्नपत्रिका घेऊन नंतर त्या भरल्या जातात असा आरोप सरदेसाई यांनी केला.

प्रमोद सावंत यांचे हे सरकार भ्रष्टाचारी जनता पार्टी सरकार हे आम्हाला पूर्वीच माहिती होते. चार महिण्यापूर्वीच मी या सरकारातील मंत्र्यांनी नोकऱ्यांचे मेन्यू कार्ड तयार केले आहे असा आरोप केला होता. माजी राज्यपाल सत्यपाल मलिक यांनी तर प्रमोद सावंत यांच्या सरकारात प्रत्येक गोष्टीत भ्रष्टाचार असल्याचे म्हटले होते. आता बाबूश मोन्सरात यांनी या सरकारला घरचा आहेर दिला आहे असे ते म्हणाले. हे सरकार निवडणूक जिंकण्यासाठी नोकऱ्यांचे वाटप करत असल्याची तक्रार आम्ही निवडणूक आयोगाकडे करू असेही ते म्हणाले.