CM Pramod Sawant: मी मुख्यमंत्री नाही तर मुख्यसेवक; कलावंतांचे सहकार्य लाभले तर गोवा देशाची सांस्कृतिक राजधानी बनेल

CM Pramod Sawant: मी मुख्यमंत्री नाही तर मुख्यसेवक आहे. सर्वांचे सहकार्य लाभले तर गोवा देशाची सांस्कृतिक राजधानी होऊ शकते, असे उद्घार मुख्यमंत्री डॉ. प्रमोद सावंत यांनी काढले.

तब्बल दोन वर्षानंतर गोव्याची राजधानी पणजीतील कला अकादमीत पुन्हा सांस्कृतिक कार्यक्रमांना सुरवात झाली आहे. स्वर मंगेश हा पहिला कार्यक्रम कार्यक्रम शुक्रवारी संध्याकाळी होता. त्याच्या प्रारंभी ते बोलत होते.

मुख्यमंत्री सावंत म्हणाले, माझ्या आधी बोलणाऱ्यांनी राजा उल्लेख केला. मी काही राजा नाही आणि मुख्यमंत्रीही नाही. मी मुख्य सेवक आहे. गोवा राज्याची अंत्योदय तत्वानुसार सेवा करत आलो आहे. काम करत आलो आहे. गोवा ही देशाची सांस्कृतिक राजधानी होऊ शकते.

त्यासाठी सर्वांचे सहकार्य गरजेचे आहे. गोवा पर्यटन राजधानी आहेच. गोव्याला देशाची सांस्कृतिक राजधानी करण्यासाठीही आम्ही सगळे प्रयत्न करत आहोत. कलाकारांचे सहकार्य लाभले तर गोवा निश्चित्त सांस्कृतिक राजधानी होईल, याची मला खात्री आहे.

मुख्यमंत्री म्हणाले, सांस्कृतिक वारसा जपला, पुढे नेला तरच आपण टिकू शकू. भारताने जगाला योग, आयुर्वेद आपली संस्कृती जगाला देण्याची हीच योग्य वेळ आहे. आगामी काळात आपण सांस्कृतिकदृष्ट्या जगावर राज्य करू शकतो.

ते म्हणाले, पेडण्यापासून काणकोणपर्यंत गोव्याच्या गावागावात भारतीय संस्कृतीचे चांगले साधकच नव्हे तर श्रोतेही तयार व्हायला हवेत. त्यासाठी असे कार्यक्रम होणे गरजेचे आहे. त्यासाठी सरकारचे सहकार्य लाभेल.

गोव्याचा हॅपीनेस इंडेक्स उगाच वाढत नाही. अशा कार्यक्रमांतूनच हा हॅपीनेस इंडेक्स वाढतो, असेही मुख्यमंत्री म्हणाले.