हरमल: मांद्रे उपवीज केंद्रावर जवळजवळ 50 कोटी रुपये खर्च होणार आहेत. याशिवाय इतर दोन योजनेवर 30 कोटी मिळून एकूण 80 कोटींचा खर्च अपेक्षित आहे. ही कामे पूर्ण झाल्यानंतर मांद्रेतील जनतेला विनाखंडित वीजपुरवठा होईल, असे वीजमंत्री ढवळीकर यांनी सांगितले.
भूमिगत केबल्स घालण्याच्या भूमिपूजन सोहळ्यात वीजमंत्री ढवळीकर बोलत होते. यावेळी वीज अभियंता अनिलकुमार, मांद्रे मतदारसंघातील माजी जिल्हा पंचायत सदस्य, सरपंच, उपसरपंच, पंचसदस्य व कार्यकर्ते मोठ्या संख्येने उपस्थित होते.
ढवळीकर म्हणाले, मांद्रे मतदारसंघात वीज समस्या मोठी आहे. मांद्रेतील जनतेसाठी प्रलंबित असलेले वीजपुरवठा करणारे वीजउपकेंद्र व भूमिगत केबल्स घालण्याचे काम वर्षभरात नक्की पूर्ण करू, अशी ग्वाही वीजमंत्री सुदिन ढवळीकर यांनी दिली.
आपण ज्या-ज्या खात्याचा मंत्री म्हणून कार्यभार स्वीकारला, त्या प्रत्येक खात्यात उल्लेखनीय कार्य करण्याची जबाबदारी पार पाडली आहे. यापुढेही ती पार पाडली जाईल. राज्याचे पहिले मुख्यमंत्री भाऊसाहेब बांदोडकर हे मांद्रे, पेडणे तालुक्यातील व त्यानंतर फोंडा तालुक्यातील मडकई मतदारसंघातून निवडून आले होते. या तालुक्यातील जनतेच्या विशेष मागणींची दखल व पाठपुरावा मांद्रे मतदारसंघाचे आमदार जीत आरोलकर यांनी केल्याने प्राधान्याने ही समस्या हाती घेण्यात आली, असेही ढवळीकर म्हणाले.
आमदार आरोलकर म्हणाले, वीजमंत्री ढवळीकर यांनी मांद्रेत उपवीजकेंद्र व भूमिगत वीजवाहिन्या घालण्याच्या कामाला प्राधान्य दिले आहे. या समस्या सोडविण्याबरोबरच धोकादायक झाडांची समस्याही त्रासदायक ठरत असल्यामुळे अनेकवेळा वीज खंडित होते. त्यामुळे धोकादायक झाडे हटविण्यासाठी मंत्री ढवळीकर यांनी संबंधित खात्याशी चर्चा करावी.
मांद्रेचे उपसरपंच महादेव हरमलकर यांनी मांद्रेवासीयांच्यावतीने मंत्री ढवळीकर यांचे अभिनंदन केले. आमदार आरोलकर यांनी पाठपुरावा केल्यामुळे उपवीजकेंद्राचे काम सुरू झाल्याचे त्यांनी सांगितले. चंद्र गावडे यांनी स्वागत केले. दयानंद मांद्रेकर यांनी सूत्रसंचालन केले. अभियंता प्रभाकर पेडणेकर यांनी आभार मानले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
