Porvorim Murder: पर्वरीतील तरूणीचा प्रेमप्रकरणातून खून; प्रियकराचे कृत्य; आंबोलीत फेकला मृतदेह

Porvorim Murder: गोव्यातील खूनांचे सत्र थांबण्याचे नाव घेताना दिसत नाही. गेल्या तीन दिवसात राज्यात चार खून झाले होते. त्यातच आता आणखी एक खूनाची घटना समोर आली आहे. पर्वरीतील एका तरूणीचा प्रेमप्रकरणातून खून झाला आहे.

कामाक्षी (वय ३०) असे या तरूणीचे नाव आहे. ती पर्वरीत राहत होती. म्हापसा पोलिस स्टेशनमध्ये याप्रकरणी गुन्हा दाखल करण्यात आला आहे. तिच्या पुर्वाश्रमीच्या प्रियकरानेच हा खून केल्याचे समोर येत आहे. सध्या फॉरेन्सिकचे पथक आंबोली घाटात तपास करत आहे. तिथे कामाक्षीच्या मृतदेहाचा शोध घेतला जात आहे.

तरूणीच्या माजी प्रियकरानेच हा खून केल्याचा संशय आहे. तरूणीच्या कुटूंबियांनी तसा आरोप केला आहे. प्रकाश चुंचवाड (वय २२) असे या संशयित तरूणाचे नाव आहे. त्याचे पर्वरीमध्ये गॅरेज आहे. दरम्यान, कामाक्षीचा खून करून तिचा मृतदेह आंबोलीत फेकण्यात आला होता. पोलिसांनी प्रकाशविरोधात अदखलपात्र गुन्हा दाखल केला आहे.

प्रकाश आणि कामाक्षी यांचे प्रेमसंबंध होते, असे सांगितले जात आहे. तथापि, कालांतराने दोघांमध्ये ब्रेकअप झाले. पण त्यानंतरही प्रकाश कामाक्षीला त्रास देत होता, असे समोर येत आहे. त्यातून दोघांमध्ये वारंवार खटके उडाले होते.

रिलेशनशिप कंटिन्यू करण्यास कामाक्षीने नकार दिला होता. त्या रागातून प्रकाशने हा खून केल्याचा संशय आहे. खरे तरं, म्हापसा पोलिस स्टेशनमध्ये संबंधित युवतीने तिचा खून होण्यापुर्वी काही तास आधी तक्रार दाखल केली होती.

पण, पोलिसांनी हे प्रकरण फारसे गांभीर्याने घेतले नाही, असे दिसते. संबंधित तक्रारीत कामाक्षीने प्रकाशने तिच्यावर हल्ला केल्याचे म्हटले होते. त्यावेळी पोलिसांनी दोघांची समजूत काढून प्रकरण मिटवले होते. त्यावेळी पोलिसांनी संशयित प्रकाश चुंचवाड दम दिला होता.

तसेच त्याच्याकडून तोंडी आणि लेखी हमी घेऊन त्याला सोडून दिले होते. त्यावेळेस प्रकाशने पोलिसांसमोर संबंधित युवतीला परत कधी त्रास देणार नाही, तिच्या आयुष्यात पुन्हा हस्तक्षेप करणार नाही, असे म्हटले होते.

तेव्हा पोलिसांनी कामाक्षीला घरी सोडण्याची व्यवस्था केली होती. पण तिने मैत्रिणींसमवेत घरी जाण्यास प्राधान्य दिले. खून होण्यापुर्वी कामाक्षी शेवटची या मैत्रिणींसमवेतच दिसून आली होती.