Mapusa Traffic Police: म्हापश्यात वाहतूक नियमांबाबत जागृतीसाठी पोलिस उतरले रस्त्यावर...

Mapusa Traffic Police: गोव्यात सध्या अपघातांतील बळी हा गंभीर आणि चर्चेचा विषय झाला आहे. त्यामुळेच वाहतूक खात्याकडूनही विविध उपाययोजना केल्या जात आहेत. त्याचाच एक भाग म्हणून बुधवारी म्हापसा येथे पोलिसांनी रस्त्यावर उतरून जनजागृती केली.

वाहतूक नियमांविषयी जागृती करण्यासाठी म्हापश्यात पोलिस निरीक्षक तुषार लोटलीकर हे आपल्या सहकारी अधिकारी, कर्मचाऱ्यांसह आज रस्त्यावर उतरले. त्यांनी वाहतूक नियमांबाबत जागृतीही केली. तसेच या मोहिमेवेळी 100 जणांना नियम उल्लंघन प्रकरणी दंड करण्यात आला.

म्हापशात राबविण्यात आलेल्या खास तपासणी मोहीमेत वाहतूक पोलीस उपअधीक्षक सिद्धांत शिरोडकर देखील सहभागी झाले. शिवाय यामध्ये पिंक फोर्स देखील या मोहिमेत सहभागी झाला.

राज्यात गेल्या 52 दिवसांत विविध भागांत घडलेल्या अपघातांत एकूण ४९ जणांचा मृत्यू झालेला आहे. पैकी 1 जानेवारी ते 19 फेब्रुवारी या काळात अपघातात 46 जणांचा मृत्यू झाला आहे. यात काही जण गंभीर तर काही किरकोळ जखमी झाले, त्यांच्यावर इस्पितळांत उपचार सुरू आहेत.

गेल्या काही दिवसांत या मुद्यावरून सर्वत्र चर्चा झडत असून मुख्यमंत्री डॉ. प्रमोद सावंत यांनी अपघातांना बेशिस्त वाहनचालक जबाबदार असल्याचे म्हटले होते. तर सर्व जबाबदारी सरकार वाहनधारकांवर ढकलत असल्याची टीका विरोधी पक्षनेते युरी आलेमाव, आमदार विजय सरदेसाई यांनी केली होती.

काही ठिकाणे ही अपघाताची केंद्रे झाली आहेत. या ब्लॅक स्पॉटकडे सरकारचे दुर्लक्ष झाले आहे. रस्त्यावरील खड्डे, ओबडधोबड रस्ते हेच अपघाताचे प्रमुख कारण असल्याचे विरोधी नेत्यांनी म्हटले होते.