मडगावचा सुनियोजित विकास हा कधी झालाच नाही...

मडगाव (Margao) : दिगंबर कामत (Digambar Kamat) हे गेली 27 वर्षे माडगावचे आमदार असूनही त्यांच्याकडून मडगावचा सुनियोजित विकास हा कधी झालाच नाही. त्यामुळे मडगाव गोव्याची आर्थिक राजधानी असूनही विकासाच्या बाबतीत मागेच राहिली, असा आरोप मडगावच्या माजी नगराध्यक्ष आणि मडगाव काँग्रेस मंडळाच्या माजी अध्यक्षा डोरिस टेक्सेरा यांनी केला.

सध्या तृणमूल पक्षात (TMC) प्रवेश केलेले कामत यांचे पूर्वीचे समर्थक डोरिस टेक्सेरा आणि नगरसेवक महेश आमोणकर यांनी आज पत्रकार परिषद घेऊन कामत यांच्यावर आरोप केले. कामत यांनी मडगावची कशी वाट लावली हे मडगाव रेल्वे स्थानक परिसराला भेट दिल्यावर कळून येते. मडगाव हे गोव्यातील (Goa) प्रमुख जंक्शन असतानाही त्याला ओंगळवाणे स्वरूप आले आहे ते पाहिल्यास मडगावकरांना (Margao) लाजेने मान खाली घालावी लागते, असे टेक्सेरा म्हणाल्या.

महेश आमोणकर (Mahesh Amonkar) यांनी कामत यांनी मडगावकडे दुर्लक्ष केल्याने फातोर्ड्याचा विकास झाला, असा आरोप करून कामत यांच्याकडे मुस्लिमांच्या कब्रस्थानचा प्रश्नही सुटू शकला नाही, असा आरोप केला.

सोयी-सुविधांचा अभाव

मडगाव ही गोव्याची आर्थिक राजधानी असूनही या शहरात चांगले मार्केट नाही, चांगले उद्यान नाही, मैदानावर पुरेशा सोयी नाहीत, पार्किंगची व्यवस्था चांगली नाही. एव्हढेच नव्हे तर पुरेशा शौचालयांचीही सोय नसल्याने लोकांना त्रास सोसावे लागत असल्याचा आरोप टेक्सेरा यांनी केला.