पणजी: महिलांच्या संरक्षणासाठी महिला पोलिस कर्मचारी असलेली पिंक फोर्स राज्यामध्ये सुरू केल्यानंतर आता येत्या काही दिवसांत पिंक रिक्षा लोकांना रस्त्यावर पाहायला मिळणार आहे. या पिंक रिक्षासाठी मुख्यमंत्री रोजगार योजनेखाली आर्थिक विकास महामंडळामार्फत (ईडीसी) सवलतीच्या दरात कर्ज तसेच रोटरी क्लबतर्फे मदत केली जाणार असल्याची माहिती मुख्यमंत्री डॉ. प्रमोद सावंत यांनी ईडीसीमधील कार्यक्रमानंतर पत्रकारांशी संवाद साधताना दिली.
‘स्वयंपूर्ण गोवा’ या उपक्रमांतर्गत सरकारतर्फे अनेकांना मुख्यमंत्री रोजगार योजनेमार्फत ईडीसी सहकार्य करत आली आहे. त्यामुळे अशा प्रकारचे प्रकल्प सुरू करून राज्यातील तरुण पिढीला प्रोत्साहीत करण्याचे काम केले जाईल, असे सावंत यांंनी स्पष्ट केले.
17 महिलांना प्रशिक्षण
रोटरी क्लबने सरकारच्या मदतीने महिलांना स्वयंपूर्ण बनवण्यासाठी प्रकल्प हाती घेतला आहे. या प्रकल्पातील 17 महिलांना प्रशिक्षण देणे सुरू झाले आहे. ही नाविन्यपूर्ण कल्पना असून महिलांना स्वतःच्या पायावर उभे राहण्याची संधी उपलब्ध करण्यात आली आहे. यातून महिलांची रोजगाराची समस्या दूर होणार आहे.
महिलांचा प्रवास होणार सुखकर: यापूर्वी पर्यटन विकास महामंडळाने महिला चालक असलेल्या पर्यटन गाड्या सुरू केल्या होत्या. मात्र, त्याला चांगला प्रतिसाद मिळाला नव्हता. सध्या या गाड्या रस्त्यावरही दिसत नाहीत. मात्र, आता पिंक रिक्षा या सर्वसामान्यांना परवडणाऱ्या दरामध्ये उपलब्ध होणार असून विशेष करून महिलांचा प्रवास सुखकर होणार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
