बागवाडातील भूखंड विकासकामाला स्थगिती, पिळगाव पंचायतीकडून नोटीस; विरोधात 'एसटी' बांधव एकवटले

डिचोली: ‘एसटी’ बांधवांच्या विरोधामुळे पिळगाव पंचायत क्षेत्रातील बागवाडा येथील भूखंड विकासकामाला स्थानिक पंचायतीने तात्पुरती स्थगिती दिली आहे. यासंदर्भात, पंचायतीने नोटीसही जारी केली आहे.

बागवाडा येथील लोकवस्तीपासून काही अंतरावरील निर्जनस्थळी गावाबाहेरील एका बिल्डर कंपनीकडून बुलडोझरच्या साहाय्याने जमीन सपाटीकरणाचे काम सुरू होते. मात्र, स्थानिक पंचसदस्य मोहिनी जल्मी यांनी केलेल्या तक्रारीवरून पंचायतीने कारवाई केली.

सध्या हे काम बंद असले तरी ते पुन्हा सुरू करण्यासाठी संबंधितांकडून प्रयत्न सुरू असल्याचा स्थानिकांचा दावा आहे. तसे झाल्यास आम्ही रस्त्यावर उतरू, असा इशारा ‘एसटी’ बांधवांनी दिला आहे.

‘तो’ भाग ‘इको-सेन्सिटिव्ह

ज्या परिसरात भूखंड विकसित करण्याचे काम सुरू आहे, तो भाग ‘इको-सेन्सिटिव्ह झोन’मध्ये येतो, असा दावा करण्यात आला. भूखंड विकास झाल्यास नैसर्गिक संपत्तीवर परिणाम होऊन भविष्यात गावाच्या अस्तित्वालाच धोका निर्माण होऊ शकतो, अशी भीती मोहिनी जल्मी आणि माजी पंचसदस्य शिवाजी जल्मी यांच्यासह इतर ‘एसटी’ बांधवांनी व्यक्त केली आहे.