Caranzalem: 'पुढच्या युनिटला पेट्रोल भरा', करंझाळे येथे IOCL पंप कामागाराला कार चालकाकडून मारहाण

Caranzalem petrol pump assault Case: पेट्रोल पंपावरील एक युनिट काम करत नाही म्हणून, पुढच्या युनिटला पेट्रोल भरा. असे सांगितल्याने एका कारचालकाने पंपावरील कामगाराला मारहाण केल्याची घटना उघडकीस आली आली. करंझाळे येथे हा प्रकार घडला असून, याप्रकरणी पंप मालकाने कार चालकाविरोधात तक्रार दाखल केली आहे.

मिळालेल्या माहितीनुसार, करंझाळे येथील इंडियन ऑईल (IOCL) पेट्रोल पंपावर ही घटना घडली. पंप मालक गौरीष धोंड यांनी याप्रकरणी पणजी पोलिस ठाण्यात कार चालकाविरोधात तक्रार दाखल केली आहे.

पंपावर घडलेल्या घटनेचे सीसीटीव्ही फुटेज समोर आले आहे. यामध्ये एका कारमधून कार चालक बाहेर येताना दिसत असून, बाहेर येताच तो पंप कामगाराला हाताने मारहाण करताना दिसत आहे. कारचालक कामगाराला मारहाण करत पुढे जाताना दिसत आहे.

मारहाण करणारा कार चालक स्थानिक होता की पर्यटक याबाबत अद्याप माहिती मिळालेली नाही.

मात्र, कार चालक पेट्रोल भरण्यासाठी थांबलेले युनिट कार्यरत नसल्याने पंपावरील कामगाराने त्याला पुढील युनिटवर इंधन भरण्यास सांगितले. दरम्यान, त्यामुळे राग आलेल्या कार चालकाने पंप कामगाराला मारहाण केली. अशी प्राथमिक माहिती समोर आली आहे. पोलिस अधिक तपास करीत आहेत.