Fonda Ghat: फोंडा घाटात बर्निंग टँकरचा थरार, पलटी झालेल्या पेट्रोल टँकरने घेतला पेट; वाहतूक ठप्प

Fonda Ghat, Sindhudurg

सिंधुदुर्ग: फोंडा घाटात पेट्रोल टँकर पलटी होऊन पेट घेतल्याने घाटातील वाहतूक ठप्प झाली आहे. कोल्हापूर येथून सिंधुदुर्गात येणारा पेट्रोल टँकर घाटात अचानक पलटी झाल्याने, टँकरने पेट घेतला. आगीचा मोठी भडका उघाडल्याने मार्गावरील वाहतूक पूर्णत: ठप्प झालीय. बुधवारी सायंकाळी साडे सहाच्या सुमारास हा अपघात झाला.

मिळालेल्या माहितीनुसार, भारत पेट्रोलियमचा पेट्रल टँकर कोल्हापूर येथून सिंधुदुर्गच्या दिशेने येत असताना फोंडा घाटात चालकाचे टँकरवरील नियंत्रण सुटले. टँकर पलटी होऊन त्याचा अपघात झाला व ज्वलनशील पेट्रोलने तात्काळ पेट घेतला. काही वेळातच आगीने रौद्र रुपचे धारण केले व आगीचे लोळच्या लोळ बाहेर पडू लागले.

यामुळे घाटातील वाहतूक पूर्णत: ठप्प झाली असून, वाहनांच्या लांबच्या लांब रांगा पाहायला मिळाल्या. अपघात आणि आगीची घटना अग्निशमन दल आणि पोलिसांना देण्यात आलीय. आगीवर नियंत्रण मिळवल्यानंतर टँकर बाजुला करुन वाहतूक सुरळीत केली जाणार आहे. तोवर घाटात वाहतूक ठप्पच राहण्याची शक्यता आहे.